ಬದಲಾವಣೆ
ಇರಬೇಕು ಸಹನೆ ತಪ್ಪಿಸಲು ಬಲು ಬವಣೆ
ಕರಗಿಸುತ ಕೋಪವನು ಸಹನೆಗೆ ಹಾಕು ಮಣೆ
ಸುರಿಯುವುದು ಎದೆಯಲ್ಲಿ ದಯೆ ಮತ್ತು ಕರುಣೆ
ತರುವುದು ಬದುಕಿನಲಿ ಸುಂದರ ಬದಲಾವಣೆ
ರಾಮ ರಾಮ ರಾಮ ಶ್ರೀ ರಾಮ ರಾಮ ರಾಮ
ರಾಮ ರಾಮ ರಾಮ ಶ್ರೀ ರಾಮ ರಾಮ ರಾಮ
ರಾಮನ ನಾಮವೆ ತಾರಕ ಮಂತ್ರವು
ಕಾಮನೆಗಳನೇ ಸುಡುವಾ ಅನಲ
ತಾಮಸ ಕಾಯಕೆ ಚಲಿಸುವ ಬಲವ
ನಾಮದ ಮಾತ್ರದೆ ನೀಡುವ ಸಬಲ ||
ಮರಮರ ಎನ್ನುವ ರತ್ನಾಕರನಿಗೆ
ವರಗಳ ನೀಡಿದೆ ಕಾವ್ಯವ ರಚಿಸೆ
ಸರಯೂ ತೀರದ ಚೆಲುವಿನ ಪುತ್ತಿಗೆ
ಕರೆದರೆ ಬರುವೆಯ ಎನ್ನನು ಹರಸೆ ||
ಜನರನು ಕಾಡುವ ದೈತ್ಯರ ಕೊಂದವ
ಮನದಲಿ ಎನ್ನಯ ದೋಷವ ಕೊಲ್ಲು
ಹನುಮನ ಹೃದಯದಿ ನಿಂತಿಹೆ ರಾಘವ
ಕನಿಕರ ತೋರೋ ಎದೆಯಲಿ ನಿಲ್ಲು ||
ವಂದಿಪೆ ರಾಮನೆ ನಿನ್ನಯ ಪಾದಕೆ
ಬಂದಿಹೆ ನಮಿಸುತ ಕರುಣೆಯ ಬೇಡಿ
ಚಂದದಿ ಕರೆಯೋ ಆತ್ಮದ ಸನಿಹಕೆ
ಗಂಧದ ಹಾಗೆಯೆ ನನ್ನನು ತೀಡಿ ||
ರಾಮ ರಾಮ ರಾಮ ಶ್ರೀ ರಾಮ ರಾಮ ರಾಮ
ರಾಮ ರಾಮ ರಾಮ ಶ್ರೀ ರಾಮ ರಾಮ ರಾಮ
ಆರ್ಯವೈಶ್ಯ ಸಾಹಿತ್ಯ ಪರಿಷತ್ತು,
ನಮಗು ಗೊತ್ತು, ನಿಮಗು ಗೊತ್ತು,ಎಲ್ಲರಿಗೂ ಗೊತ್ತು!
ಅಂಬೆಗಾಲ ಇಡುತ್ತಿದ್ದ ಈ ನಿಮ್ಮ ಪೋರ,
ಆಗಿಹನು ಹದಿಹರೆಯದ ಚಿತ್ತ ಚೋರ!
ಪುಟ್ಟ ಪುಟ್ಟ ಹೆಜ್ಜೆಯಿಟ್ಟು ಗಮನವ ಸೆಳೆದವ,
ಚಿಗುರು ಮೀಸೆ ತೀಡುತ್ತ ನಗುನಗುತ ನಿಂತಿರುವ!
ಸಾಹಿತ್ಯ ಸಂಸ್ಕೃತಿಗೆ ನಮಿಸಿ ಹೆಜ್ಜೆ ಇಟ್ಟವ,
ಎಲೆಯ ಮರೆಯ ಕಾಯ್ಗಳಿಗೆ ಬೆಳಕನು ಕೊಟ್ಟವ!
ಉದಯಿಸುವ ಪ್ರತಿಭೆಗಳ ಕೈಯ ಹಿಡಿದವ,
ಬೆನ್ನ ತಟ್ಟಿ ಧೈರ್ಯ ತುಂಬಿ ಅಭಯವಿತ್ತವ!
ದಾನಿಗಳ ಕೊಡುಗೆಯಿಂದ ಶಕ್ತಿವಂತನು,
ಅವರ ನೆರವನೆಂದೂ ಮರೆತು ನಡೆಯನು!
ಸದಸ್ಯರು ಕೊಟ್ಟ ಹುರುಪು ರಕ್ಷೆಯಾಯಿತು,
ಕಾರ್ಯಕಾರಿ ಶ್ರಮದಿಂದ ಯಶವು ಬಂದಿತು!
ಸಾಧಿಸಲು ಕಲಿಯುಲು ಇನ್ನೂ ಇದೆ ಬಹಳ,
ಬೆಳೆಯುವನು ಬೆಳೆಸುವನು ದಾರಿ ಮಾಡಿ ಸರಳ!
ಹೀಗೆ ಇರಲಿ ಸದಾ ನಿಮ್ಮ ಪೋಷಿಸುವ ಪಾತ್ರ,
ಆಗುವನು ಜನಾಂಗಕೆ ಕಂಗಳ ನಕ್ಷತ್ರ!
೧. ಸರ್ವಸ್ವ
ಮಗುವಿಗೆ ಮಾತೆಯ ಮಡಿಲೇ ಸರ್ವಸ್ವ
ಪ್ರಿಯತಮೆಗೆ ಪ್ರಿಯನ ಒಲವೇ ಸರ್ವಸ್ವ
ಬುವಿಗೆ ರವಿಚಂದ್ರರ ಬೆಳಕೇ ಸರ್ವಸ್ವ
ಹರಿವ ನದಿಗೆ ಕರೆವ ಕಡಲೇ ಸರ್ವಸ್ವ
ಭಕ್ತನಿಗೆ ಪರಮಾತ್ಮನ ಪಾದವೇ ಸರ್ವಸ್ವ
ಇಂದಿನ ಜನಕೆ ಚತುರವಾಣೀಯೇ ಸರ್ವಸ್ವ!
ಕಾಣುತಿಹುದು ದೀಪ ಮಾಲೆ,
ಬೀದಿಯಲ್ಲಿ ಸಾಲು ಸಾಲೆ.
ಬೆಳಕ ಬೀರಿ ನಗುವ ಚಿಮ್ಮಿದೆ,
ದೀಪಾವಳಿಯ ಹುರುಪು ತಂದಿದೆ.
ಗಂಗಾ ಮಾತೆಯೆ ಶರಣು ಶರಣು
ನೀರ ತುಂಬುವೆ ಇಂದು ನಾನು
ಶುದ್ಧವಾಗಲಿ ಮಲಿನ ತನುವು
ಹಗುರವಾಗಲಿ ನೊಂದ ಮನವು
ಕೃಷ್ಣ ದೇವನೆ ನಿನಗೆ ನಮನ
ಆಗಲಿಂದೇ ಅಸುರ ದಮನ
ನರಕ ಚತುರ್ದಶಿ ಶುಭದಿನ
ನರಕಾಸುರರಿಗೆ ಕೊನೆ ದಿನ
ಕೇಳುತಿಹುದು ಗೆಜ್ಜ ನಾದ,
ನೋಡು ಅಲ್ಲಿ ದಿವ್ಯ ಪಾದ,
ಬಂದಳಗೋ ಲಕುಮಿ ತಾಯಿ,
ಸಲಹು ಎಮ್ಮನು ನೀನು ಮಾಯಿ.
ಬಕುತಿ ಭಾವಗಳು ಚಿಮ್ಮಿ ಓಕುಳಿ
ಹರುಷದಾ ದೀಪಾವಳಿ
ದೀಪಗಳ ಸಿರಿ ಬೆಳಕಲಿ
ವಿಶ್ವ ಶಾಂತಿಯು ಹರಡಲಿ
ನೀಡಿ ಬೆಳಕಿನ ಎರವಲು
ದೀಪವಾಗಿಸು ಎನ್ನನು.
ದೀಪಾವಳಿಗಳ ಮಾಲೆಯಲ್ಲಿ,
ಚೆಂದ ಪೋಣಿಸು ಎನ್ನನು.
ಜಗಕೆ ಮಿಣುಕು ಬೆಳಕನಿತ್ತು
ಕುಣಿವೆ ನಿನ್ನ ಹೆಸರಲಿ.
ಕೆರಯ ನೀರನು ಕೆರೆಗ ಚೆಲ್ಲಿದ,
ಧನ್ಯ ಭಾವವು ನನ್ನದಿರಲಿ.
ಮನದ ತಮವು ಕರಗಲಿ,
ಜಡತೆ ಮಾಯವಾಗಲಿ.
ಜಗದ ನೋವು ನೀಗಲಿ,
ಹೊಸ ಬೆಳಕಿನಾ ಬೆಳಕಲಿ.
