ಮಾತೃ ಭಾಷೆಯೇ ಮಧುರ ನುಡಿಯು,
ನಾಲಿಗೆಯ ಕುಣಿಸುವ ಪದಗಳ ಖನಿಯು!
ಎದೆಯ ಹಾಲಿನ ಸುಮಧುರ ಸವಿಯು,
ಕಿವಿಗಳಿಗೆ ತಾಯ ಎದೆಬಡಿತದ ದನಿಯು!
ಕಣ್ಣುಗಳು ಕಂಡರೂ ಪರದೇಶವನು,
ಪರಭಾಷೆಯೇ ತಲುಪಲಿ ಕಿವಿಗಳನು,
ನಾಲಿಗೆ ನುಡಿಯಲಿ ಅಮ್ಮನ ಭಾಷೆ,
ಅಮ್ಮಗೆ ನೀನೆಂದೆಂದಿಗೂ ಕೂಸೇ!
ವ್ಯವಹಾರದ ಭಾಷೆಯು ಏನೇ ಇರಲಿ,
ಅದು ಹೊರಬಾಗಿಲ ಹೊರಗೇ ಇರಲಿ!
ಮಮತೆಯ ಮಾತೆಯ ತೊರೆಯದಿರು,
ಹೂರಗಿನ ಥಳುಕಿಗೆ ಮರುಳಾಗದಿರು!
ಮರೆತರೆ ನಾವು ನಮ್ಮಯ ಭಾಷೆ,
ಅನಾಥರು ನಮ್ಮಯ ಮನೆಯಲ್ಲೇ!
ಕಲಿತರೂ ಬುಧ್ಧಿಯು ಪರಭಾಷೆಯನು,
ಎದೆ ಮಿಡಿಯಲಿ ಮಣ್ಣಿನ ಭಾಷೆಯಲಿ!
ಕನ್ನಡ ತಾಯಿಯ ಪ್ರೀತಿಯ ಕೂಸೆ,
ಕನ್ನಡ ನಮ್ಮಯ ಹೆಮ್ಮೆಯ ಭಾಷೆ,
ಭಾಷೆಯು ಬರದವಗೆ ನೀ ಕಲಿಸು,
ಮಣ್ಣಿನ ಋಣವನು ಪರಿಹರಿಸು!
