ತುರುಬಲಿ ತಾರೆಗಳ ಬಂಧಿಸಿ,
ಚಂದ್ರ ತಿಲಕವ ಧರಿಸಿ,
ಕಪ್ಪು ಸೀರೆಯನುಟ್ಟ ಅಂದ,
ಚೆಲುವೆ ನೀ ಬಂದೆ ಎಲ್ಲಿಂದ?
ಯಾವ ಲೋಕದ ಚೆಲುವೆ ನೀನು?
ದಾರಿ ತಪ್ಪಿ ಬಂದೆಯೇನು?
ನನ್ನ ಕಣ್ಣಿಗೆ ಹಬ್ಬ ತಂದು,
ಇದಿರು ನಿಂದಿರುವೆ ಇಂದು!
ಕನಸು ಮೂಡಿತೊ ಹೇಗೆ?
ನಾ ಕಣ್ಣು ಮುಚ್ಚಿದೆ ಹಾಗೆ.
ಕಣ್ಣು ತೆರೆದೆ ನಾ ಸುಮ್ಮನೆ,
ಅಚ್ಚರಿಯೇ ಕಣ್ಣೆದುರು ಗಮ್ಮನೆ!
ಮೇಘ ಮಲ್ಲೆಯನೇರಿಸಿ,
ಸೂರ್ಯ ತಿಲಕವ ಧರಿಸಿ,
ಬೆಳಕ ಸೀರೆಯನುಟ್ಟ ತರಳೆ,
ರಮಣಿ ನೀ ಯಾರು ಹೇಳೆ?
ರಾತ್ರಿ ಕಂಡಾ ರಮಣಿ ಆಗ,
ಹೇಳದೇ ಹೋದಳೆಲ್ಲಿಗೆ ಈಗ?
ಈಗ ಕಂಡ ಈ ಚೆಂದುಳ್ಳಿ ಚೆಲುವೆ,
ಬಂದಳೆಲ್ಲಿಂದ ಹೇಳು ಮನವೆ?
