ಗಾಳಿಪಟ

ನಿನ್ನ ಪ್ರೀತಿಯ ಸೂತ್ರ ಪಿಡಿಪು, 

ಗಾಳಿಪಟವಾಯ್ತು ನನ್ನೆದೆ. 

ಬಾಲಂಗೋಚಿಯಂಥ ನೆನಪು,

ಜೋಲಿ ಹೊಡೆವುದ ತಡೆದಿದೆ!

ಎದೆಯ ಗೂಡಲಿ ಹುರುಪು ಮೂಡಿ, 

ಮೇಲೆ ಹಾರುವ ಎನಿಸಿತು.

ಮಂದ ಮಾರುತ ಕೈಯ ನೀಡಿ, 

ಹಾರು ಬಾ ಎಂತೆಂದಿತು. 

ಹರುಷದಿಂದ ಮೇಲೆ ಸಾಗುತ,

ಸಗ್ಗ ತಲುಪಿ ನಿಂತೆನು.

ನಿನ್ನ ಕಾಣುವ ತವಕ ಕಾಡುತ,

ನಿನ್ನೆ ಹುಡುಕಲು ಹೊರಟೆನು.

ರಂಭೆ ರೂಪಸಿ ಕಂಡೆ ಅಲ್ಲಿ,

ಹಾದಿ ತಪ್ಪಿಸೊ ಗೊಂಬೆಯು.

ನಿನ್ನ ತಲುಪುವ ದಾರಿಯಲ್ಲಿ,

ಅಡ್ಡ ಬರುತಿಹ ಕೊಂಬೆಯು.

ನಿನ್ನ ಕಾಣದೆ ಮನವು ಬೆಂದು,

ಎದೆಗೆ ಯಾತನೆ ನೀಡಿತು.

ನಿನ್ನ ನೆನಪಿನ ಸೆಳೆತವೊಂದು, 

ಎಳೆದು ಭೂಮಿಗೆ ತಂದಿತು!