ದೇವಗಂಗೆ

ಇಳಿದು ಬಂದೆ ಗಂಗೆ ತಾಯೇ

ಹರಿಯ ಚರಣ ಕಮಲದಿಂದ

ಶಿವನ ಜಟೆಯ ಸೇರಿ ನಿಂದೆ ದಿವ್ಯ ಪಾವನೀ!

ನಮ್ಮ ಪಾಪ ತೊಳೆಯಲೆಂದೇ

ಹರಿಹರರ ತಾಕಿ ಬುವಿಗೆ ಬಂದೆ

ಪಾಪನಾಶಿನಿ ನಮಗೆ ಸದ್ಗತಿ ನೀಡಲೋಸುಗ!

ಕಪಿಲ ಮುನಿಗಳ ಶಾಪ ತೊಳೆಯೆ

ಜೀವದುಂಬಲು ಭಗೀರಥನಾ

ಪಿತರಿಗೋಸುಗೆ ಬಂದೆಯಾದರೂ ಪೊರೆದೆ ಎಮ್ಮನು!

ನಮಿಪೆ ತಾಯೇ ನಮ್ಮ ಕಾಯೇ

ಪಾಪ ನಾಶಿನಿ ಪುಣ್ಯದಾಯಿನಿ

ವರವ ನೀಡುವ ದೇವ ಕನ್ಯೆಗೆ ತಲೆಯ ಬಾಗುವೆ!

ಅಲಕನಂದೆಯೆ ಭೋಗವತಿಯೇ

ಬಾರೆ ಭಾಗೀರಥಿಯೆ ಜಾಹ್ನವಿ

ದೇವಗಂಗೆ ಗಿರಿಮಂಡಲಗಾಮಿನಿ ನಮನ ನಿನಗೆ!

ವಿಷ್ಣುಪಾದೀ ನರಕಭೀತಿಹೃತೇ

ದೇವಭೂತಿ ಹರಶೇಖರಿಯೇ

ಭಾಗ್ಯವತೀ ವರನದಿ ನಮಸ್ತೆ ನಮೋನಮಃ!