ಹಸಿದಾಗ ಸಿಗುವ ಆ ಒಂದು ತುತ್ತು,
ಬೆಲೆಯು ಕೇವಲ ಹಸಿದವಗೇ ಗೊತ್ತು!
ದೇಹವ, ಪ್ರಾಣವ, ಜೊತೆಹಿಡಿವ ಗುಟ್ಟು,
ಯಾರಿಗೂ ತಿಳಿಯದು ಅನ್ನಕೆ ಬಿಟ್ಟು!
ಹಸಿದಾಗ ಸಿಗುವ ಒಂದು ಹಿಡಿ ಅನ್ನ,
ಅನ್ನಪೂರ್ಣೇಶ್ವರಿ ಕೊಟ್ಟ ವರದಾನ!
ಪಡೆದವಗೆ ಸಂತೃಪ್ತಿ ನೀಡುವ ದಾನ,
ಅದೊಂದೇ ಅಲ್ಲವೇ ಅನ್ನದಾನ!
ಹೊಟ್ಟೆ ತುಂಬಿದಾಗ ಮೃಷ್ಟಾನ್ನ,
ಬೇಡದ ಮುಷ್ಟಿ ಬೂದಿಗೆ ಸಮಾನ!
ಬೆಲೆಕಟ್ಟಲಾಗದು ಅನ್ನದ ಋಣಕೆ,
ಚಿನ್ನದ ಋಣವೂ ನಿಲ್ಲದು ಸಮಕೆ!
ಮರೆಯಬಾರದೆಂದೂ ಅನ್ನದ ಋಣವ,
ಅದು ಸೇರಿದೆ ದೇಹದ ಕಣಕಣವ!
ಏನೇ ಇತ್ತರೂ ತೀರದೀ ಋಣ,
ತಿನ್ನಲಾಗದೆಂದೂ ಕುಡಿಕೆ ಹಣ!
ಹಸಿದ ಹೊಟ್ಟೆಗೆ ನೀಡಿ ಹಿಡಿ ಅನ್ನ,
ತೀರಿಸು ದೇವರುಣಿಸಿದ ಋಣವನ್ನ!