ಮುಕ್ತಕಗಳು - ೮

ಒಂಟಿಯೇ ಗಾಳಿಯಲಿ ತಿರುಗುವಾ ಗಿರಗಿಟ್ಲೆ?

ಒಂಟಿ ನಾನಲ್ಲ ನೀನಿರಲು ಸಖನಾಗಿ |

ನೆಂಟ ನೀನೇ ಬರುವೆ ಜೊತೆಯಾಗಿ ಕೊನೆವರೆಗೆ 

ಬಂಟ ನಾನಾಗಿರುವೆ ಪರಮಾತ್ಮನೆ ||೩೬||

ಕನಸೆಲ್ಲ ಕರಗಿರಲು ಮನದಲ್ಲಿ ಕಹಿಯಿರಲು

ತನುವಲ್ಲಿ ಜಡವಿರಲು ನಿದಿರೆ ದೂರಾಗೆ |

ಜಿನುಗಿಸಲು ಹೊಸ ಹುರುಪು ಮರೆಯಲಿಕೆ ಕಹಿಯನ್ನು

ನಿನನಿಡುವೆ ಮನದಲ್ಲಿ ಪರಮಾತ್ಮನೆ ||೩೭||

ಎಲ್ಲ ಕೊಡುತಿಹ ಬುವಿಗೆ ನಾವೇನು ಕೊಟ್ಟಿಹೆವು

ಗಿಲ್ಲಿಹೆವು ಗುದ್ದಿಹೆವು ಮೆದ್ದಿಹೆವು ಬೆಲ್ಲ |

ಗಲ್ಲಿಯಲಿ ಶ್ವಾನವೂ ತಿರುಗಿ ಬೀಳುವುದೊಮ್ಮೆ

ಕಲ್ಲುಹೊಡೆದರೆ ನಿತ್ಯ ಪರಮಾತ್ಮನೆ ||೩೮||

ಕರದಲ್ಲಿ ಪಿಡಿದಿಹೆವು ಮಾಯದಾಟಿಕೆಯನ್ನು

ಭರದಲ್ಲಿ ತೊರೆದಿಹೆವು ಮತ್ತೆಲ್ಲವನ್ನು |

ಎರಡು ಮೊನಚಿನ ಖಡ್ಗ ಕೊಯ್ಯ ಬಲ್ಲದು ಕತ್ತ

ಮರೆತು ಮೈಮರೆತಾಗ ಪರಮಾತ್ಮನೆ ||೩೯||

ಏನೆ ಮಾಡಲಿ ನಾವು ನೋವಾಗದಂತಿರಲಿ

ಜಾನುವಾರುಗಳಿಗೂ ಬಿಸಿ ತಾಕದಿರಲಿ |

ನಾನು ಗೋಡೆಗೆಸೆವಾ ಚೆಂಡೊಂದು ಹಿಮ್ಮರಳಿ

ತಾನೆದೆಗೆ ತಾಕುವುದು ಪರಮಾತ್ಮನೆ ||೪೦||