ಚುನಾವಣೆ 2009

ಅಂತೂ ಇಂತೂ ಮುಗಿಯಿತು ಎಣಿಕೆ,
ಓಡದ ಕುದುರೆಯ ಕತ್ತಲಿ ಕುಣಿಕೆ.

ತಕ್ಕಡಿಯ ಕಪ್ಪೆಗಳಿಗೆ ಆಯಿತು ದಿಗ್ಭ್ರಮೆ,
ನೆಗೆಯಲು ಬಿದ್ದರು ನೀರಿಲ್ಲದೆ ಭಾವಿಗೆ.
ಆರು ದೋಸೆ, ಮೂರೂ ದೋಸೆ, ಬಯಸಿ ಬಂದವರು,
ಭವತಿ ಭಿಕ್ಷಾಂದೇಹಿ ಎನ್ನುವಂತಾಯಿತು.

ತುಂಡು ವೀರರು, ಬಂಡುಕೋರರು,
ಸುಳಿಗಾಳಿಗೆ ಸಿಕ್ಕ ತರೆಗೆಲೆಗಳಾದರು.
ರಾಣಿಜೇನುಗಳು ಪರಿತಪಿಸಿದರು,
'ಜೀ ಹುಜೂರ್' ಎನ್ನುವರಿಲ್ಲದೆ.

ಕೊನೆಗೂ ಸರಿಯಿತು ಕತ್ತಲ ಪರದೆ,
ಮೂಡಿತು ದೇಶಕೆ ಉದಯದ ಹಣತೆ.
ಗೊಂದಲ ಕಳೆಯಿತು, ನೆಮ್ಮದಿ ಮೂಡಿತು,
ಸ್ಥಿರ ಸರಕಾರಕೆ ಬುನಾದಿ ದೊರಕಿತು!

ಎಲ್ಲಾ ಬೇಕು!

ನನಗೂ ಬೇಕು, 

ನನ್ನ ಮಗನಿಗೂ ಬೇಕು, 

ಕೇಳಿದರು ಸೀಟು... 

ನನಗೂ ಬೇಕು, 

ನಮ್ಮಮ್ಮನಿಗೂ ಬೇಕು, 

ಕೋರಿದರು ಓಟು... 

ನಮಗೂ ಬೇಕು, 

ಮರಿಮಕ್ಕಳಿಗೂ ಬೇಕು, 

ಕೂಡಿಟ್ಟರು ನೋಟು...

ಮತ್ತೆ ಬರುವನು ವಸಂತ

ವಸಂತ ಬಂದಾಗ, ಕೈಹಿಡಿದು ನಕ್ಕಾಗ,

ಎದೆತುಂಬಿ ಚಿಮ್ಮಿತು ನಿನಗೆ ಸಂತಸದ ಹಸಿರು.

ಗ್ರೀಷ್ಮನೋಡಿ ಬಂದು, ವಸಂತನನಟ್ಟಿದಾಗ,

ಬೆಂದೆ ವಿರಹದುರಿಯ ಬೇಗೆಯಲ್ಲಿ.

ಗೆಳತಿ ವರ್ಷಳು ಸುರಿಸಿದಳು ಕಣ್ಣೀರ ಧಾರೆ,

ನಿನ್ನೊಡಲ ತಾಪಕೆ ನೊಂದು, ಬೆಂದು.

ಶರತನ ಸಾಂತ್ವನದ ನುಡಿ ಹನಿಗಳು,

ತಂದಿತಾದರೂ ತುಸು ಸಮಾಧಾನ,

ಹೇಮಂತನಾಗಮಿಸಿ, ವಸಂತನ ಮರೆ ಎಂದಾಗ,

ಮರಗಟ್ಟಿದೆ ನೀನು, ಮೈ ಕೊರೆವ ಮಂಜಿನಂತೆ!

ಶಿಶಿರನು ತಂದ ಸಂತಸದ ಸುಗ್ಗಿ,

ವಸಂತನು ಮತ್ತೆ ಬರುವ ಸುದ್ದಿ!

ಸಸುನಗೆಯು ಚಿಗುರಿ, ಮೈಯೆಲ್ಲ ಅರಳಿ,

ಕಾದಿರುವೆ ಕಾತುರದಿ,  ಮತ್ತೆ ಬರುವ ವಸಂತನಿಗಾಗಿ!

ಗಾಳಿಪಟ

ನಿನ್ನ ಪ್ರೀತಿಯ ಸೂತ್ರ ಪಿಡಿಪು, 

ಗಾಳಿಪಟವಾಯ್ತು ನನ್ನೆದೆ. 

ಬಾಲಂಗೋಚಿಯಂಥ ನೆನಪು,

ಜೋಲಿ ಹೊಡೆವುದ ತಡೆದಿದೆ!

ಎದೆಯ ಗೂಡಲಿ ಹುರುಪು ಮೂಡಿ, 

ಮೇಲೆ ಹಾರುವ ಎನಿಸಿತು.

ಮಂದ ಮಾರುತ ಕೈಯ ನೀಡಿ, 

ಹಾರು ಬಾ ಎಂತೆಂದಿತು. 

ಹರುಷದಿಂದ ಮೇಲೆ ಸಾಗುತ,

ಸಗ್ಗ ತಲುಪಿ ನಿಂತೆನು.

ನಿನ್ನ ಕಾಣುವ ತವಕ ಕಾಡುತ,

ನಿನ್ನೆ ಹುಡುಕಲು ಹೊರಟೆನು.

ರಂಭೆ ರೂಪಸಿ ಕಂಡೆ ಅಲ್ಲಿ,

ಹಾದಿ ತಪ್ಪಿಸೊ ಗೊಂಬೆಯು.

ನಿನ್ನ ತಲುಪುವ ದಾರಿಯಲ್ಲಿ,

ಅಡ್ಡ ಬರುತಿಹ ಕೊಂಬೆಯು.

ನಿನ್ನ ಕಾಣದೆ ಮನವು ಬೆಂದು,

ಎದೆಗೆ ಯಾತನೆ ನೀಡಿತು.

ನಿನ್ನ ನೆನಪಿನ ಸೆಳೆತವೊಂದು, 

ಎಳೆದು ಭೂಮಿಗೆ ತಂದಿತು!

ವಿರೋಧಿ ನಾಮ ಸಂವತ್ಸರ

ನಾಮ ‘ವಿರೋಧಿ’ ಎಂದು, 

ಮಾನ ಕಳೆಯದಿರಿ ಎನಗೆ. 

ನಾಮ ಹಾಕುವವರು, 

ಮಾನಗೇಡಿಗಳು, 

ಇವರಿಗಷ್ಟೇ ವಿರೋಧಿ ನಾನು. 

 ನಿಮ್ಮ ವಿರೋಧಿಗಳಿಗೆ ವಿರೋಧಿ ನಾನು, 

ಮುನ್ನಡೆಯೋಣ ಅವಿರೋಧದಿಂದ ನಾವು. 

ನಾಮ ಮಾತ್ರಕೆ ವಿರೋಧಿಸಿದರೆ ಸಾಲದು, 

ನಿರ್ನಾಮವಾಗಿಸಬೇಕು ವಿರೋಧಗಳನ್ನು. 

 ಬೇಯುತಿವೆ ಚುನಾವಣೆಯ ಕಾವಿನಲ್ಲಿ, 

ಆಳುವ, ವಿರೋಧ ಪಕ್ಷಗಳು. 

ನಾಮಾವಶೇಷವಾಗಿಸೋಣ ಜನ ವಿರೋಧಿಗಳನ್ನು, 

ಈ ವಿರೋಧಿ ನಾಮ ಸಂವತ್ಸರದಲ್ಲಿ!