ಕಣ್ಣು ಅರಳಿದೆ, ಕನಸು ಕಂಡಿದೆ,
ಒಲವ ಸೂಸುತ ಮುಗುಳುನಕ್ಕಿದೆ,
ಏನು ತಾನೆ ಮಾಡಬಲ್ಲದು? ಅಳಿಸಲಾಗದು ನಿನ್ನ ಬಿಂಬ!
ಕಿವಿಯು ನಿಮಿರಿದೆ, ಕಾದು ಕುಳಿತಿದೆ
ಮತ್ತೆ ಮತ್ತಲಿ ಮುಳುಗಲು,
ಏನು ತಾನೆ ಮಾಡಬಲ್ಲದು? ನಿನ್ನ ಸ್ವರದ ಆಸೆ ತುಂಬ!
ಮೂಗು ಬೇಡಿದೆ ಮತ್ತೆ ಮತ್ತೆ,
ನಿನ್ನ ಉಸುರಿನ ಪರಿಮಳ,
ಏನು ತಾನೆ ಮಾಡಬಲ್ಲದು? ಹುಚ್ಚು ಹಿಡಿದ ತುಂಟ ಹುಂಬ!
ತುಟಿಯು ಬೇಡಿದೆ ಮಧುರ ಸ್ಪರ್ಷವ,
ಮತ್ತು ಹಿಡಿಸುವ ಓಷ್ಠಲಾಘವ,
ಏನು ತಾನೆ ಮಾಡಬಲ್ಲದು? ರುಚಿಯ ಕಂಡ ಕಳ್ಳ ಬೆಕ್ಕು!
ನನ್ನ ಹೃದಯವು ಕುಣಿದು ಹಾಡಿದೆ,
ಮಧುರ ತಾಳದಿ ಒಲವ ರಾಗದಿ,
ಏನು ತಾನೆ ಮಾಡಬಲ್ಲದು? ನೀನೆ ಇರಲು ಅದರ ತುಂಬ!
ರಾಜಮಾರ್ಗವೊ, ಅಡ್ಡದಾರಿಯೊ,
ಕಲ್ಲುಮುಳ್ಳಿನ ಕಠಿಣ ಪಥವೊ,
ನಿನ್ನ ಕಡೆಗೆ ನನ್ನ ನಡಿಗೆ, ಬೇರೆ ದಾರಿ ಎಲ್ಲಿದೆ?
No comments:
Post a Comment