ಗುಡಿಸುವ ಕೆಲಸ

ಕಾಸು ಬೇಕಾದಾಗ, ಕೈಚಾಚಿದೆ ಅಪ್ಪನ ಮುಂದೆ.
ನಿನ್ನ ಬುದ್ಧಿಯ ನಂಬು, ನಿನ್ನ ರಟ್ಟೆಯ ನಂಬು,
ಅಪ್ಪ ಎಂದರು, ಕಾಣುವುದು ಕಾಸು ನಿನ್ನ ಕಿಸೆಯಲ್ಲೇ!

ಕಣ್ಣೀರು ಜಿನುಗಿದಾಗ, ಹುಡುಕಿದೆ ಆಸೆರೆಯ ಹೆಗಲಿಗಾಗಿ.
ಎಂಥ ನಷ್ಟವೇ ಇರಲಿ, ಎಂಥ ಕಷ್ಟವೇ ಬರಲಿ, ಗೆಳೆಯನೆಂದ,
ನಿನ್ನ ಜೀವನವ ರೂಪಿಸುವ ಶಿಲ್ಪಿ ನೀನೆ ಎಂದ!

ದಾರಿ ಕಾಣದಾದಾಗ, ಹುಡುಕಿದೆ ಕಾಣದ ದೇವರಿಗಾಗಿ.
ಹುಡುಕಿ ಅಲೆಯುವೆಯೇಕೆ ಹುಚ್ಚ, ಗುರುಗಳೆಂದರು,
ದೇವನಿರುವನು ನಿನ್ನಲ್ಲ್ಲೇ, ಕಣ್ಣು ಮುಚ್ಚಿದರೆ ಕಾಣುವನು ಕುಳಿತಲ್ಲೇ!

ಹೇ ದೇವ, ನೀ ಎನಗೆ ಎಲ್ಲವನೂ ಕೊಟ್ಟೆ,
ಕಸವನೂ ಕೊಟ್ಟೆ, ಕಸಬರಿಕೆಯನೂ ಕೊಟ್ಟೆ,
ಗುಡಿಸುವ ಕೆಲಸ ಮಾತ್ರ ನನಗೆ ಬಿಟ್ಟೆ!