ಬಣ್ಣಗಳ ಹೋಳಿ

ಅಣ್ಣ ತಮ್ಮ, ಅಕ್ಕ ತಂಗಿ,
ತಾಯಿ ತಂದೆ, ಅಜ್ಜಿ ತಾತ,
ಗೆಳೆಯ ಗೆಳತಿ, ಒಲಿದ ಜೋಡಿ,
ಬಂಧ ಹಲವು, ಬಣ್ಣ ಹಲವು.

ಕೆಂಪು, ಹಸಿರು, ಹಳದಿ, ನೀಲಿ,
ಬಂಧ ತಳೆವ ರಂಗು ಹಲವು,
ರಂಗು ಗುಂಗು, ಹೋಳಿ ಇಲ್ಲಿ,
ಬನ್ನಿ ತೋರಿ, ನಿಮ್ಮ ಒಲವು.

ಮನದ ಕಾಮವ ಸುಡುವ ಬನ್ನಿ,
ಸುಡುವ ನೆನಪನು ಸುಟ್ಟು ಬಿಡುವ.
ಮೂಲೆ ಮೂಲೆ ಹುಡುಕಿ ತನ್ನಿ,
ಹಳೆಯ, ಹರಿದ, ತೊರೆದು ಬಿಡುವ.

ನಮ್ಮ ಅಹಂ ನಮಗೆ ವೈರಿ,
ಬೆಂಕಿ ಹಚ್ಚಿ ಸುಟ್ಟು ಬಿಡುವ.
ಧ್ಯಾನ ಮಾಡಿ, ಎಲ್ಲ ಸೇರಿ,
ಶಿವನ ಪಾದ ಹಿಡಿದು ಬಿಡುವ.

ಸುಟ್ಟ ಮೇಲೆ ಹಗುರ ಮನವು,
ಸ್ನಾನ ಮಾಡಿ ಶುದ್ಧ ತನುವು,
ಮತ್ತೆ ಸಜ್ಜು ಬಾಳ ಯಾತ್ರೆಗೆ,
ಜೀವನ ಎನ್ನುವ ಜಾತ್ರೆಗೆ!