ಗುರುದರ್ಶನ

ನಿನಗಾಗಿ ಕಾಯುತಿಹೆ ಗುರುವೆ,
ದರುಶನವ ನನಗೆಂದು ಕೊಡುವೆ?
ನಂಬಿಹೆ ಬರುವೆಯೆಂದು, ಬಂದು
ನೀ ದಾರಿ ತೋರುವೆ ಎಂದು!

ಕಗ್ಗಂಟ ಬದುಕಿದು, ಕಾಡಂಥ ಜಗವಿದು,
ಕಣ್ಣಿಗೆ ಬಟ್ಟೆ ಕಟ್ಟಿದ ಪಾಡು ನನ್ನದು!
ದಾರಿ ಕಾಣದು, ಸಮಯ ನಿಲ್ಲದು,
ಕೈ ಹಿಡಿದು ನಡೆಸುವ ಭಾರ ನಿನ್ನದು!

ಬಂದೆನೇಕೋ ನಾ ಈ ಬುವಿಗೆ,
ತಿಳಿಯಪಡಿಸು ನೀ ಇಂದೆನಗೆ.
ಅಂಧಕಾರದಿ ಕಳೆಯುತಿಹೆ ವರುಷಗಳ,
ಬೀರು ಚಿತ್ತದಲಿ ಬೆಳಕಿನ ಕಿರಣಗಳ!
 
ಕಣ್ಣು ತೆರೆವೆನು ಆಗ ಅರಿವಿನ ಬೆಳಕಿಗೆ,
ತಲೆ ಬಾಗುವೇ ನಾ ನಿನ್ನಯ ಕೊಡುಗೆಗೆ.
ಅರ್ಥವಾಗಲಿ ಪಡೆದ ಜನ್ಮದ ಮರ್ಮ,
ನಿರಂತರವಾಗಲಿ ಅರ್ಥಪೂರ್ಣ ಕರ್ಮ!