ಗಡಿಗಳು, ಗಡಿಗಳು, ಬೇಡದಾ ಬೇಲಿಗಳು,
ಸಂಘರ್ಷವ ಹುಟ್ಟಿಸುವ ಗಟ್ಟಿ ಬೇರುಗಳು!
ಸಂಕುಚಿತ ಮನಸಿನ ಫಲಗಳೇ ಗಡಿಗಳು,
ಎದ್ದಿವೆ ಎಲ್ಲೆಲ್ಲೂ ಕೃತಕ ಗೋಡೆಗಳು!
ಗಡಿಯಿರುವ ಎಲ್ಲಡೆಯೂ ಸಂಘರ್ಷ ಖಚಿತ,
ಪಾಪದ ಜನರಿಗೆ ಸಂಕಷ್ಟ ಉಚಿತ!
ದೇಶಗಳ ಗಡಿಗಳಲಿ ಯೋಧರದೇ ಬಲಿದಾನ.
ರಾಜ್ಯದ ಗಡಿಗಳಲಿ ಭಾಷೆಯದೇ ಪ್ರಾಧಾನ್ಯ!
ಜಾತಿ, ಧರ್ಮದ ಗಡಿಗಳು ಮನಸುಗಳ ನಡುವೆ!
ಶಾಂತಿ, ಸಹನೆ ಪಾಠಗಳ, ಯಾರಿಗಿದೆ ಗೊಡವೆ?
ಬಾನಿಗೆಲ್ಲಿದೆ ಗಡಿಯು, ಗಾಳಿಗೆಲ್ಲಿದೆ ಗಡಿಯು?
ಹತ್ತಿ ಉರಿಯುವ ಅಗ್ನಿಗೆಲ್ಲಿಹುದು ಗಡಿಯು?
ಪ್ರಳಯದ ಪ್ರವಾಹವ ತಡೆವುದಾವ ಗಡಿಯು?
ಭೂತಾಯ ಪ್ರೀತಿಗೆ ಎಲ್ಲಿಹುದು ಗಡಿಯು?
ದೇವ ದೇವನಿಗಿಲ್ಲ ಯಾವುದೇ ಗಡಿಯು
ಎಲ್ಲರ ದೇಹಗಳೂ ಅವನ ನಿಜ ಗುಡಿಯು
ನನ್ನ ನಿನ್ನ ಅವನ ನಡುವೆ ಬೇಕೆ ಗಡಿಯು?
ವಸುದೈವ ಕುಟುಂಬವು ಅಲ್ಲವೇ ಈ ಜಗವು!
ದೇವ ನೀಡದ ಗಡಿಯ ಗೊಡವೆ ನೀಗೋಣ,
ನಾವೆ ಕಟ್ಟಿದ ಬೇಲಿಗಳ ಕಿತ್ತು ಎಸೆಯೋಣ!
ಒಡೆದು ಹಾಕುವ ಗೋಡೆಗಳ ಗಡಿಯಿಲ್ಲದಂತೆ,
ಸ್ನೇಹದ ಗಾಳಿಯಾಡಲಿ ಎಲ್ಲೆಡೆ ತಡೆಯಿಲ್ಲದಂತೆ!
No comments:
Post a Comment