ಮುಕ್ತಕಗಳು - ೪೩

ನಿನ್ನ ನೀ ತಿದ್ದುತಿರು ಅನುದಿನವು ಬೆಳೆಯುತಿರು

ಮನ್ನಿಸುತ ತಪ್ಪುಗಳ ಒಪ್ಪುಗಳ ಹುಡುಕು |

ಉನ್ನತಿಯು ದೊರಕುವುದು ಬಹುಬೇಗ ಸುಳ್ಳಲ್ಲ

ಜೊನ್ನವೇ ಜೀವನವು ~ ಪರಮಾತ್ಮನೆ ||೨೧೧||

ವನಸುಮವು ಏನ ಸಾಧಿಸಿತು ಕಿರು ಬದುಕಿನಲಿ?

ಜನಕಿತ್ತಿತೇ ಗಂಧ ಮುಡಿಯೇರಿತೇನು? |

ಬನದ ಸನ್ಯಾಸಿ ತಾ ಏನು ನೀಡಿದ ಜಗಕೆ?

ಜನನಿಗೂ ಸುಖವಿಲ್ಲ ~ ಪರಮಾತ್ಮನೆ ||೨೧೨||

ಬೆಲೆಯುಂಟು ಮರಗಳಿಗೆ ಧರೆಗೆ ಬಿದ್ದರು ಕೂಡ

ಫಲನೆರಳುಗಳ ನೀಡುವವು ಜೀವವಿರಲು |

ಕಲಿಯಬೇಕಿದೆ ಪಾಠ ಮರದಂತಹವರಿಂದ

ಬೆಲೆಬಾಳುವುದು ಬಾಳು ~ ಪರಮಾತ್ಮನೆ ||೨೧೩||

ಕನ್ನಡಿಯು ದೋಷಿಯೇ ಬಿಂಬ ಅಂದವಿರದಿರೆ

ಭಿನ್ನರೂಪವ ತೋರದದು ನಿನ್ನ ಹೊರತು |

ನಿನ್ನಜನ ದೂರಿದರೆ ನಿನ್ನ ನಡೆ ಕಂಡವರು

ಸನ್ನಡತೆ ಬೆಳೆಸಿಕೋ ~ ಪರಮಾತ್ಮನೆ ||೨೧೪||

ಕರುಗಳಿಗೆ ಇರಬೇಕು ಹಸುಗಳಾ ಮೊಲೆಯುಣಿಕೆ

ತರುವೊಂದೆ ಆಧಾರ ಬೆಳೆಯುವಾ ಲತೆಗೆ |

ಇರಬೇಕು ನಿನ್ನಾಸರೆಯು ನನಗೆ ಬಾಳಿನಲಿ

ಕರಪಿಡಿದು ನಡೆಸುವೆಯ  ಪರಮಾತ್ಮನೆ? ||೨೧೫||

ಮುಕ್ತಕಗಳು - ೨೯

ಧರೆಯಲ್ಲಿ ಬಾಳುವುದ ಕಲಿಯುವಾ ಮುನ್ನವೇ

ಪುರವನ್ನು ಕಟ್ಟುವುದೆ ಚಂದಿರನ ಮೇಲೆ |

ಹೊರಗೆಲ್ಲೊ ಕಾಲಿಟ್ಟು ಎಡವುವಾ ಮುನ್ನವೇ

ಧರಣಿಯಲಿ ಬದುಕೆ ಕಲಿ ಪರಮಾತ್ಮನೆ ||೧೪೧||

ದುಃಖವನು ನುಂಗುವಳು ಅನುದಿನವು ಅಮ್ಮ ತಾನ್

ದುಃಖದನಲವು ದಹಿಸುತಿಹುದು ಒಡಲಿನಲಿ |

ಯಃಕಶ್ಚಿತ್‌ ನೋವು ಕಾಣದು ನಗುಮೊಗದಲಿ, ಅಂ

ತಃಕರಣವೆನೆ ಅಮ್ಮ ಪರಮಾತ್ಮನೆ ||೧೪೨||

ವಿಜ್ಞಾನ ನೀಡುತಿದೆ ಭೌತಿಕದ ಜ್ಞಾನವನು

ವಿಜ್ಞಾನಿಯತಿಯಾಸೆ ವಿಧ್ವಂಸಕಾರಿ |

ಅಜ್ಞಾನ ಕಳೆಯುತಿದೆ ಆಧ್ಯಾತ್ಮ ಜ್ಞಾನವನು 

ಸುಜ್ಞಾನ ಬೇಕಿಂದು ಪರಮಾತ್ಮನೆ ||೧೪೩||

ನಿನ್ನ ನೀ ತಿಳಿವದಿದೆ ಮುನ್ನಡೆಯ ಸಾಧಿಸಲು

ಕನ್ನಡಿಯು ತೋರುವುದು ನಿನ್ನನೇ ನಿನಗೆ |

ಮಣ್ಣಿನಾ ದೇಹವನು ನೋಡಿದರೆ ಫಲವಿಲ್ಲ

ಕನ್ನಡಿಯ ಹಿಡಿ ಮನಕೆ ಪರಮಾತ್ಮನೆ ||೧೪೪||

ಇರುವೆಯೆಂದರೆ ಶಿಸ್ತಿರುವ ಸಿಪಾಯಿಯ ತೆರದಿ

ಕೊರತೆಯೇನಿಲ್ಲ ಮುಂದಾಲೋಚನೆಗೂ |

ಮರೆಯದೆಂದೂ ತನ್ನವರ ಕೂಡಿಬಾಳುವುದ

ಇರುವೆಯಿಂ ಕಲಿವುದಿದೆ ಪರಮಾತ್ಮನೆ ||೧೪೫||