ಧನವನಾಕರ್ಷಿಸುವುದುಂಟು ಧನ ಚುಂಬಕವು
ಧನವು ಬೆಳೆಸುವುದು ಸಂತತಿಯನತಿಶಯದಿ |
ಕೊನೆಗೆ ಹೂತಿಟ್ಟರೂ ಪಡೆಯುವುದು ಮರುಜನುಮ
ಧನಪುರಾಣವಿದುವೇ ಪರಮಾತ್ಮನೆ ||೬೬||
ಕಲಿಯುವುದು ಮುಗಿಯುವುದೆ ಜೀವನದ ಕೊನೆವರೆಗೆ
ಕಲಿಕೆ ಜೀವದ ಸೂಕ್ಷ್ಮ ಸಂಕೇತ ಸಾಕ್ಷಿ |
ಕಲಿವುದೇನಿಲ್ಲದಿರೆ ಬದುಕಲೇನಿದೆ ನಮಗೆ
ಕಲಿಕೆ ನಾಡಿಮಿಡಿತವು ಪರಮಾತ್ಮನೆ ||೬೭||
ವೈರಾಣು ಬಂದಿಹುದು ವೈರಿರೂಪದಲಿಂದು
ಬಾರಿಸುತ ಮರಣಭೇರಿಯ ನಿಲ್ಲದಂತೆ |
ಮೀರಿ ಭೇದಗಳ ಹೋರಾಡಬೇಕಿದೆಯಿಂದು
ತೋರಿಕೆಯು ಸಲ್ಲದದು ಪರಮಾತ್ಮನೆ ||೬೮||
ರಾಜಧರ್ಮವಮರೆತ ದೇಶನಾಶಕರಿವರು
ರಾಜಕೀಯದ ಮುಸುಕು ಧರಿಸಿ ನಿಂದಿಹರು |
ಗಾಜಿನಾ ಮನೆಯಲ್ಲಿ ಕಲ್ಲು ತೂರಾಡಿಹರು
ರಾಜಿಯಾಗಿಹೆವಲ್ಲ ಪರಮಾತ್ಮನೆ ||೬೯||
ತಂಗದಿರ ಬುವಿಗಿತ್ತ ರಜತಮಯ ಕಾಂತಿಯನು
ಚಂಗದಿರನಿತ್ತಿಹನು ಹೊನ್ನಿನಾಭರಣ |
ರಂಗನಾಥನ ಸತಿಗೆ ವೈಭವದಲಂಕಾರ
ಸಿಂಗರದ ಸಂಭ್ರಮವು ಪರಮಾತ್ಮನೆ ||೭೦||
