ಬಾಲ್ಯದ ನೆನಪು (ಶರಷಟ್ಪದಿ)

 ಹಿಂದಿನ ದಿನಗಳ,

ಚೆಂದದ ನೆನಪಿನ,

ಬಂದಿದೆ ಸುಂದರ ಮೆರವಣಿಗೆ!

ಅಂದದ ವಯಸಿನ,

ಸುಂದರ ಸಂತಸ,

ಗಂಧದ ಕಂಪಿನ ನೆನಪುಗಳು!

ಮರಗಳ ಹತ್ತುತ,

ಕೆರೆಯಲಿ ಮೀಯುತ,

ಮರೆತೆವು ಸಮಯವ ದಣಿವಿರದೆ!

ಉರಿಯುವ ಬಿಸಿಲಲಿ

ಕರೆಯಲು  ಮಾತೆಯ

ಕೊರಳಿನ ದನಿಗೇ ಬೆದರಿದೆವು!

೪|೪|

೪|೪|

೪|೪|೪|-

೪|೪|

೪|೪|

೪|೪|೪|-

ವಾಸವಿ ಮಾತೆ

ವಾಸವೀ ಮಾತೆ ಬಾರಮ್ಮ ಹರಸಮ್ಮ ನೀ

ವೈಶ್ಯರಾ ವರವು ನೀನಮ್ಮ ||ಪ||

ಕುಸುಮ ಶ್ರೇಷ್ಠಿಯ ಪುತ್ರಿಯು ನೀನು

ಕುಸುಮಾಂಬಿಕೆಯ ಕಣ್ಮಣಿ ನೀನು |

ಕುಸುಮ ಕೋಮಲೇ ಕುಮಾರಿ ಬಾರೇ

ವಸುಧೆಯ ಕಂದರ ತಪ್ಪದೆ ಕಾಯೇ ||೧||

 

ಪೆನುಗೊಂಡೆಯಲಿ ಜನ್ಮವ ಪಡೆದೆ

ಅನುಜನ ಜೊತೆಜೊತೆಯಾಗಿ ಬೆಳೆದೆ |

ತನುಮನ ಬಾಗಿಸಿ ನೇಮದೆ ಭಜಿಸುವೆ

ಜನುಮವ ಸಾರ್ಥಕವಾಗಿಸೆ ಬೇಗ ||೨||

 

ಆದಿಶಕ್ತಿಯ ಅಂಶವು ನೀನು

ಆದಿಗುರುವಿನ ಶಂಕರಿ ನೀನು |

ಕಾದಿಹೆ ನಾನು ನಿನ್ನಯ ಕರುಣೆಗೆ

ಛೇದಿಸು ಎನ್ನಯ ಕರ್ಮವ ತಾಯೇ ||೩||

 

ಅಂಕೆ ಇಲ್ಲದೆ ಭಾಗ್ಯವ ಕೊಟ್ಟು

ಶಂಕೆ ಇಲ್ಲದ ಮನಸನು ನೀಡು |

ಸಂಕಟ ಹರಿಸು ಸಂತಸ ಹರಿಸು

ಬೆಂಕಿಯಿಲ್ಲದ ಬದುಕನು ಹರಸು ||೪||

ವಿಶ್ವರೂಪವ ತೋರುತ ಬಾರೆ

ಆಶ್ವಮನವನು ಹಿಡಿತಕೆ ತಾರೆ |

ನಶ್ವರ ಬದುಕಿಗೆ ದಾರಿಯ ತೋರುತ

ಈಶ್ವರನೆಡೆಗೆ ಮನವನು ಸೆಳೆಯೇ ||೫||

("ಭಾಗ್ಯದಾ ಲಕ್ಷ್ಮೀ ಬಾರಮ್ಮ" ಕೀರ್ತನೆಯ ಧಾಟಿಯಲ್ಲೇ ಹಾಡಬಹುದಾದ ಹಾಡು)

ಹೊಸವರ್ಷ 2021

ತರಲಿ ಈ ಹೊಸವರ್ಷ,

ನವಚೇತನದ ಹರ್ಷ!

ಹಳೆಯ ಗಾಯಗಳ ಮರೆಸಿ,

ಹೊಸ ಹುರುಪ ಮೆರೆಸಲಿ!

ಕೈತುಂಬ ಕೆಲಸವಿರಲಿ,

ಕಣ್ತುಂಬ ನಿದ್ದೆಯಿರಲಿ,

ಎಲ್ಲರಲ್ಲೂ ಸ್ನೇಹ ಬೆಳೆದು,

ಮನಕೆ ನೆಮ್ಮದಿ ತರಲಿ!

ಗಡಿಗಳಲ್ಲಿ ಶಾಂತಿಯಿರಲಿ,

ಗುಡಿಗಳಲ್ಲಿ ಪೂಜೆಯಿರಲಿ,

ಮಾವು, ತೆಂಗು, ಬಾಳೆಗಳು,

ತೂಗಿ ತೊನೆಯಲಿ!

ಮುಖದ ಗವುಸು ದೂರವಾಗಿ,

ಹಣೆಯ ಸುಕ್ಕು ಮಾಯವಾಗಿ,

ಸ್ವಚ್ಛಂದದ ಕಿರುನಗೆಯು,

ಹೆಮ್ಮೆಯ ಒಡವೆಯಾಗಲಿ!

ಮುದ್ದು ಕಂದ

 ಪುಟ್ಟ ಪುಟ್ಟ ಹೆಜ್ಜೆ ಇಡುತಾ,

ಬಟ್ಟಲ ಕಂಗಳ ಅರಳಿಸಿ ಬರುವೆ,

ನಗುವ ಹೂಗಳ ಪರಿಮಳ ಚೆಲ್ಲುತ,

ಎದೆಯಲಿ ಸಂತಸ ಅರಳಿಸಿ ನಗುವೆ!

ಮಗುವೆ, ಮಗುವೆ, ನೀನೇ ಒಡವೆ,

ಇಲ್ಲ ನಿನಗೆ ಯಾವುದೇ ಗೊಡವೆ,

ಸುಂದರ ಮೊಗವು, ನಿಷ್ಕಲ್ಮಶ ಮನವು,

ಸಂತಸದಲೆಯಲಿ ತೇಲಿದೆ ಗೃಹವು!

ಅಪ್ಪ, ಅಮ್ಮನ, ಮುದ್ದಿನ ಕೂಸೆ,

ಸಂತಸ ಲಹರಿಯ ಚಿನ್ನದ ಮೂಸೆ,

ನಿನ್ನನು ಎತ್ತಿ ಆಡುವ ಆಸೆ,

ಕೊಡುವೆನು ನಿನಗೆ ಒಂದು ಭಾಷೆ!

ಉತ್ತಮ ನೀರು, ಉತ್ತಮ ಗಾಳಿ,

ನಿಮಗೆ ನೀಡುವುದೆಮ್ಮೆಯ ಪಾಳಿ,

ಭಾಷೆಯ ಕೊಡುವೆವು ನಿಮಗಿಂದು,

ಶುದ್ಧ ಪರಿಸರ ರಕ್ಷಣೆ ನಮದೆಂದು!

ಧನ್ಯವಾದಗಳು ನಿನಗೆ ಓ 2020!

 ಅತಿಯಾಸೆಯ ನಾಗಾಲೋಟಕೆ,

ಹಾಕಿದೆ ಲಗಾಮು ಕುರುಡು ಓಟಕೆ.

ದುಡ್ಡೇ ದೊಡ್ಡಪ್ಪನಲ್ಲ ಎನ್ನುವ,

ಪಾಠ ಕಲಿಸಿದ ಗುರು ನೀ 2020!

ವಿಮುಖ ಸಂಬಂಧಗಳ ಬಳಿಸೆಳೆದೆ,

ತಿರುಗಿಸಿ ಮುಖಾಮುಖಿಯಾಗಿಸಿದೆ.

ಮನೆಯೇ ಮಂತ್ರಾಲಯ ಎನ್ನುವ,

ಪಾಠ ಕಲಿಸಿದ ಗುರು ನೀ 2020!

ದೀನರ ಆರ್ತನಾದಕೆ ಮನಕರಗಿಸಿದೆ,

ಎದೆಯ ಕರುಣೆಯ ಹೊರಚಿಮ್ಮಿಸಿದೆ.

ಜನಸೇವೆಯೇ ಜನಾರ್ದನನ ಸೇವೆ ಎನ್ನುವ,

ಪಾಠ ಕಲಿಸಿದ ಗುರು ನೀ 2020!

ವೈದ್ಯರು, ದಾದಿಯರು, ಪೌರಕಾರ್ಮಿಕರು,

ತನುಮನಗಳ ತೇಯುವಂತೆ ಮಾಡಿದೆ.

ವೈದ್ಯೋನಾರಾಯಣೋ ಹರಿಃ ಎನ್ನುವ,

ಪಾಠ ಕಲಿಸಿದ ಗುರು ನೀ 2020!

ತಂದೆ ನೀ ಸೌಟು ಹಿಡಿಯದ ಕೈಗಳಿಗೆ,

ನಳಪಾಕವಿಳಿಸುವ ಸವಿಘಳಿಗೆ!

ಹಿತ್ತ ಗಿಡದಲ್ಲೂ ಮದ್ದಿದೆ ಎನ್ನುವ,

ಪಾಠ ಕಲಿಸಿದ ಗುರು ನೀ 2020!

ತಂತ್ರಜ್ಞಾನವ ಹಿರಿಯರ ಕೈಯಲಿತ್ತೆ,

ಸುಖದುಃಖಗಳ ವಿನಿಮಯಕ್ಕೆ ದಾರಿಯಿತ್ತೆ.

ಅಗತ್ಯವೇ ಆವಿಷ್ಕಾರದ ತಾಯಿ ಎನ್ನುವ,

ಪಾಠ ಕಲಿಸಿದ ಗುರು ನೀ 2020!

ಸಂಕಷ್ಟವ ಎದುರಿಸುವ ಶಕ್ತಿ ಹೊರತಂದೆ,

ಕಾಯಕ ಬದಲಿಸುವ ಹೊಸ ಹೆಜ್ಜೆ ಇಡಿಸಿದೆ.

ಈಜು ಕಲಿಯಲು ನೀರಿಗೆ ಬೀಳಲೇಬೇಕೆಂಬ,

ಪಾಠ ಕಲಿಸಿದ ಗುರು ನೀ 2020!

ಧನ್ಯವಾದಗಳು ನಿನಗೆ ಓ 2020!

ಕತ್ತಲಿನಿಂದ ಬೆಳಕಿನೆಡೆಗೆ

 ನಡೆ, ಕತ್ತಲಿನಿಂದ ಬೆಳಕಿನೆಡೆಗೆ,

ಭ್ರಮೆಯಿಂದ ವಾಸ್ತವದೆಡೆಗೆ!

ಆಗುತ್ತಿರುವೆವು ನಾವು ಕುರಿಗಳು,

ಹುಲಿಗಳು ಈ ರಾಜಕಾರಣಿಗಳು!

ಎಚ್ಚೆತ್ತುಕೊಳ್ಳಬೇಕಿದೆ ಗೆಳೆಯರೆ ನಾವು,

ಹುಲಿಕುರಿಯಾಟದಲ್ಲಿ ಬಲಿಯಾಗುವ ಮುನ್ನ!

ಕತ್ತಲಿದೆ, ಕತ್ತಲಿದೆ ಮನದಲ್ಲಿ!

ಮನದ ಸೂರ್ಯನ ಮರೆಮಾಡಿವೆ,

ಅಜ್ಞಾನದ ಕರಿ ಮೋಡಗಳು.

ಗುರು ಬೇಕು ಮೋಡ ಚದುರಿಸಲು!

ಜ್ಞಾನಭಂಡಾರದ ದೀಪವಿತ್ತಿಹರು ಹಿರಿಯರು,

ಆ ದೀಪದ ಗುಂಡಿಯೊತ್ತಬೇಕಿದೆ ಅರಿತು,

ತಮಾಂಧಕಾರವ ಚದುರಿಸಲು,

ಸತ್ವದ ಬೆಳಕಲ್ಲಿ ಸಂಚರಿಸಲು!

ವಿಶ್ವಪ್ರೇಮದ ಹರಿಕಾರ

ಪರಮಹಂಸನ ಪರಮಶಿಷ್ಯ, ಹರಿಕಾರ ನೀ ವಿವೇಕಾನಂದ, 

ಭವ್ಯ ಭಾರತ ಭೂಮಿಯಲ್ಲಿ, ಪಡೆದೆ ನೀ ದಿವ್ಯ ಜನುಮ,

ತಂದೆ ಗುರುವಿಗೆ ಕೀರುತಿ, ತಂದೆ ವಿವೇಕಕೆ ಆನಂದ,

ಸಾಗರದಾಚೆಯ ನಾಡಿನಲ್ಲಿ, ಎತ್ತಿಹಿಡಿದೆ ತಾಯ ನಾಮ!

ಅದ್ವೈತ ತತ್ವ, ಸ್ವದೇಶಿ ಮಂತ್ರ, ಎತ್ತಿಹಿಡಿದ ಪುಣ್ಯಪಾದ,

ಯಾವ ಪುಣ್ಯದ ಫಲವೋ, ನೀನಾದೆ ಮಹಾಮಹಿಮ,

"ನಮ್ಮ ನಾಡು, ನಮ್ಮ ಹೆಮ್ಮೆ", ಎತ್ತಿಹಿಡಿದೆ ನಿನ್ನ ವಾದ,

ಸೋದರ ತತ್ವವ ಸಾರಿ ಜನರಿಗೆ, ತುಂಬಿದೆ ನೀ ವಿಶ್ವಪ್ರೇಮ!

ನಮ್ಮ ನಾಡ ಪುಣ್ಯ, ದೈವ ತಂದ ವರದ ಪೆಂಪು,

ಯುವಕರ ಬದುಕಿಗೆ ಬೆಳಕನಿತ್ತ ಕಾಮಧೇನು!

ನಿನ್ನ ಮಹಿಮೆಗೆ ಮಾರಿಹೋದರಲ್ಲ ಕುವೆಂಪು,

ಹರಡಿದರು ಕನ್ನಡದಲ್ಲೂ ನಿನ್ನ ಮಹಿಮೆಯ ಜೇನು!

ಇಂದು ನಿನ್ನ ಜನ್ಮದಿನವು, ನೆನಸಿಕೊಳ್ಳುವ ಶ್ರೇಷ್ಠ ದಿನವು,

ಚೈತನ್ಯ ತರಲಿ ಬದಕಿಗೆ, ನಮ್ಮ ಪಾಲಿನ ಮಹಾ ವರವು!

(ಸಾನೆಟ್‌/ಸುನೀತ)