ನಕ್ಕರೆ ಬೆಳದಿಂಗಳು

ಪುಟ್ಟ ಚಂದ್ರನ ಹೊಳೆವ ಕಂಗಳು,

ನಕ್ಕರೆ ಬೆಳದಿಂಗಳು!

ಅತ್ತರಂತೂ ಕಿವಿಗೆ ಇಂಪಿನ,

ನಾದಸ್ವರದ ಸ್ವರಗಳು!

ಪುಟ್ಟ ಪಾದವು ಎದೆಯ ಮೇಲೆ,

ಭರತನಾಟ್ಯವ ಮಾಡಲು,

ಥೈಯ ಥಕ್ಕ ಎಂದು ಕುಣಿದವು,

ಮನದ ಗೆಜ್ಜೆಯ ಕಾಲ್ಗಳು!

ನನ್ನ ಸ್ವರಕೆ ಕಂಗಳರಳಿ,

ನಿನ್ನ ತುಟಿಗಳು ಬಿರಿಯಲು,

ಹರಿಯಿತಿಲ್ಲಿ ನನ್ನ ಎದೆಯಲಿ,

ತಿಳಿಯ ನೀರಿನ ತೊರೆಗಳು!

ನಿನ್ನನಪ್ಪಿ ಎದೆಗೆ ಅವಚಲು,

ಏನೋ ತೃಪ್ತಿಯ ಸಾಧನೆ,

ನನ್ನ ನಾನೇ ಅಪ್ಪಿದಂತಹ,

ಮರೆಯಲಾಗದ ಭಾವನೆ!

ಮುಗ್ಧ ಮುಖದ ಮಂದಹಾಸವು,

ಕೋಟಿ ಸೂರ್ಯ ಸಮಪ್ರಭ!

ದಂತ ಮೂಡದ ನಿನ್ನ ಪೊರೆಯಲಿ,

ಏಕದಂತನು ಸರ್ವದಾ!

(ಮೊಮ್ಮಗ ಅವ್ಯಾನ್‌ ಹುಟ್ಟಿದಾಗ ರಚಿಸಿದ್ದು)