ಮುಕ್ತಕಗಳು - ೯೧

ಫಲಭರಿತ ವೃಕ್ಷಗಳು ಬೆಳೆಸೆ ತಮ ಸಂತತಿಯ

ಬೆಲೆಯಾಗಿ ನೀಡುತಿವೆ ರಸಭರಿತ ಸವಿಯ |

ಸಲಿಸೆ ಕೋರಿಕೆ ಬೀಜಬಿತ್ತಿ ಹದುಳಿಸಿ ಸಸಿಯ

ಬೆಳೆಸುವಾ ಮರಗಳನು ~ ಪರಮಾತ್ಮನೆ ||೪೫೧||

ಹದುಳಿಸು = ತಣಿಸು / ತೃಪ್ತಿ ಪಡಿಸು

ಮನಸು ತುಟಿಗಳ ನಡುವೆ ಬೇಕೊಂದು ಸೋಸುತೆರೆ

ಅನಿಸಿದುದನೆಲ್ಲವನು ಆಡಬೇಕಿಲ್ಲ! |

ದನಿಗೊಡುವ ಹರುಷವನು ಹಂಚುವಾ ಯೋಚನಗೆ

ಕೊನೆಗೊಳಿಸಿ ದುರ್ಭಾವ ~ ಪರಮಾತ್ಮನೆ ||೪೫೨||

ಇರುವರೇ ಶತ್ರುಗಳು ಕಣ್ಣು ನಾಲಿಗೆಗಿಂತ?

ಸರಿದಾರಿ ತಪ್ಪಿಸುವ ಧೂರ್ತ ಪಂಡಿತರು! |

ಬರಸೆಳೆದು ಆಸೆಗಳ ಮನದಲ್ಲಿ ತುಂಬಿಸುತ

ಹರಿಯ ಹೊರಗಟ್ಟುವವು ~ ಪರಮಾತ್ಮನೆ ||೪೫೩||

ಆ ದೇವ ನಿರುವ ಮಾತೆಯ ಮಮತೆಯಲಿ, ಇರುವ

ಆ ದೇವ ತಂದೆಯಾ ಹೊಣೆಗಾರಿಕೆಯಲಿ |

ಮಾದೇವ ಅತಿಥಿ, ಗುರುಗಳ ವೇಷ, ಅರಿವಿನಲಿ

ವೇದಗಳು ನಾಲ್ಕಿವೇ ~ ಪರಮಾತ್ಮನೆ ||೪೫೪||

ಕಾಲಡಿಗೆ ಮುಳ್ಳು ಚುಚ್ಚಿರೆ ತಪ್ಪು ಯಾರದದು?

ಕಾಲಿನದೊ ಮಲಗಿದ್ದ ಮುಳ್ಳಿನದೊ ಹೇಳು? |

ಬಾಳಿನಲಿ ಎಚ್ಚರದ ಹೆಜ್ಜೆಯಿಡಲಾಗದಿರೆ

ಉಳಿವೆಲ್ಲ ರಕುತಮಯ ~ ಪರಮಾತ್ಮನೆ ||೪೫೫||

ಮುಕ್ತಕಗಳು - ೫೬

ಮೂಳೆ ಮಾಂಸಗಳಿರುವ ಜೀವಯಂತ್ರವು ಮನುಜ

ಬಾಳಿಕೆಗೆ ನೂರ್ವರುಷ ಸಂಕೀರ್ಣ ಸೃಷ್ಟಿ |

ಪೀಳಿಗೆಗಳೇ ನಶಿಸಿದವು ಲಕ್ಷ  ಸಂಖ್ಯೆಯಲಿ

ಆಳ ಉದ್ದಗಳರಿಯ ಪರಮಾತ್ಮನೆ ||೨೭೬||

ವೇದಗಳು ನೀಡುವವು ಬದುಕುವಾ ಜ್ಞಾನವನು

ಗಾದೆಗಳು ಬದುಕಿನಾ ಅನುಭವದ ಸಾರ |

ವಾದ ಮಾಡದೆ ರೂಢಿಸೆರಡು ಉಪಕರಣಗಳ

ಹಾದಿ ಸುಗಮವು ಮುಂದೆ ~ ಪರಮಾತ್ಮನೆ ||೨೭೭||

ಅಪರಂಜಿ ನಗವಾಗೆ ಎಲ್ಲರೂ ಮಣಿಸುವರು

ಕಪಿಚೇಷ್ಟೆಗೂ ಅಂಕು ಡೊಂಕಾಗಬಹುದು |

ಉಪಯೋಗವಾಗುವುದು ತುಸು ತಾಮ್ರ ಸೇರಿದರೆ

ಹಪಹಪಿಸು ತುಸು ಕೊರೆಗೆ ~ ಪರಮಾತ್ಮನೆ ||೨೭೮||

ಕೊರೆ = ನ್ಯೂನತೆ

ವಿಜ್ಞಾನ ಬೆಳೆಯುತಿದೆ ಸಿರಿಯು ಹೆಚ್ಚಾಗುತಿದೆ

ಅಜ್ಞಾನ ಹೆಚ್ಚಿಸಿದೆ ವ್ಯಾಪಾರಿ ಬುದ್ಧಿ |

ಸುಜ್ಞಾನ ವಿರಬೇಕು ವಿಜ್ಞಾನಿಗಳಿಗೆಲ್ಲ

ಅಜ್ಞರಾ ಸರಿಪಡಿಸು ಪರಮಾತ್ಮನೆ ||೨೭೯||

ಆರ್ಯೆ ಬಂದಿಹಳು ಮಾತಾಪಿತರ ತೊರೆಯುತ್ತ

ಭಾರ್ಯೆಯೊಳು ತೋರು ಅಕ್ಕರೆಯ ಅನವರತ |

ಧೈರ್ಯವನು ತುಂಬುವಳು ಹೆಗಲ ಆಸರೆ ನೀಡಿ

ಕಾರ್ಯಲಕ್ಷ್ಮಿಯವಳೇ ~ ಪರಮಾತ್ಮನೆ ||೨೮೦||

ಮುಕ್ತಕಗಳು - ೧೩

ವೇದದಲಿ ತಿಳಿಸಿರುವ ಸಂಕಲ್ಪ ಪೂಜೆಗಳು

ಹಾದಿಯಲ್ಲವು ಸಾತ್ವಿಕರಿಗಾಗಿ ಮರುಳೆ |

ಕಾದಿರಿಸಿ ನಾರದರು ಪೇಳಿರುವ ಸತ್ಯವಿದು

ನಾದದಲ ಪಸ್ವರವು ಪರಮಾತ್ಮನೆ ||೬೧||

ಸಮತೆಯೆಲ್ಲಿದೆ ಜಗದ ಸೃಷ್ಟಿಯಲಿ ಬಂಧುಗಳೆ

ಸಮತೆ ಬೇಕೆನ್ನದಿರಿ ಮಾನವರ ನಡುವೆ |

ಮಮತೆಯಿರಬೇಕೆಲ್ಲ ಜೀವರಾಶಿಗಳಲ್ಲಿ

ಮಮತೆಸಮ ವಾಗಿರಲಿ ಪರಮಾತ್ಮನೆ ||೬೨||

 

ತಿಂಡುಂಡು ಮಲಗಿದರೆ ಮಂಡೆ ಬೆಂಡಾಗುವುದು

ದಂಡ ಮಾಡಿದ ಸಮಯ ಹಿಂದೆ ಬರಬಹುದೆ |

ದಂಡಿಸಲು ದೇಹವನು ಚೈತನ್ಯ ತುಂಬುವುದು 

ಗುಂಡಿಗೆಗೆ ಮಯ್ಯೊಳಿತು ಪರಮಾತ್ಮನೆ ||೬೩||

ನದಿಯ ಹಾದಿಯ ಬದಲಿಸಲು ಸಾಧ್ಯ ಬುವಿಯಲ್ಲಿ

ಬದಲಿಸಲು ಸಾಧ್ಯವೇ ವಿಧಿವಿಲಾಸವನು |

ಎದೆತಟ್ಟಿ ಪೇಳುವೆ ಶ್ರದ್ಧೆಯಚಲವಿರೆ ನೀ

ಬದಲಿಸುವೆಯೆಮಗಾಗಿ ಪ್ರಮಾತ್ಮನೆ ||೬೪||

ಪ್ರಾರಬ್ಧವೆನೆ ಹಿಂದೆ ನಾ ಮಾಡಿರುವ ಕರ್ಮ

ಯಾರು ಬದಲಿಸಬಲ್ಲರದ ನನ್ನ ಹೊರತು |

ಪಾರಾಯಣ ಧ್ಯಾನ ಸೇವೆ ಲಂಘನದಿಂದ

ಪ್ರಾರಬ್ಧ ಬದಲಿಸುವೆ ಪರಮಾತ್ಮನೆ ||೬೫||