ಬಣ್ಣಗಳೆಲ್ಲ ಕಪ್ಪಾಗಿಹೋಗಿವೆ,
ಬಾಳು ತಾಳವ ತಪ್ಪಿದೆ!
ನೀನು ಇಲ್ಲದ ಬದುಕು ಬರಡು
ಚಳಿಗಾಳಿಗೆ ಕೊರಡಾಗಿದೆ |
ಮಧುಮಾಸದ ನೆನಪು ಕಾಡಿದೆ
ಪ್ರೀತಿ ಸುಮವು ಬಾಡಿದೆ ||೧||
ನಾನು ಮಾಡಿದ ಯಾವ ತಪ್ಪಿಗೆ
ಶಿಕ್ಷೆಯಾಗಿದೆ ಅಗಲಿಕೆ? |
ನೀನು ಇಲ್ಲದ ಪ್ರೇಮಲೋಕವು
ಅಂಧಕಾರದಿ ಮುಳುಗಿದೆ ||೨||
ಒಂಟಿ ನಾನು ಬಾಳ ಕಡಲಲಿ
ಹುಟ್ಟು ಹಾಕಲು ನೀನಿಲ್ಲದೆ |
ಬಾಳ ನೌಕೆಯು ದಾರಿ ತಪ್ಪಿದೆ
ಗೊತ್ತು ಗುರಿಯು ಇಲ್ಲದೆ ||೩||
ಮರಳಿ ಬಾರದ ಲೋಕವೆಲ್ಲಿದೆ
ತಿಳಿಸು ಬರುವೆನು ಅಲ್ಲಿಗೇ |
ಮತ್ತೆ ಸೇರುವ, ಮತ್ತೆ ಹಾಡುವ
ಪ್ರಣಯಗೀತೆಯ ನಾಳೆಗೆ ||೪||
ಮುರಳಿ ಮಾಧವನೆ ಕರುಣ ಸಾಗರನೆ ಚರಣ ತೋರಿಸೆನೆಗೇ|
ವರದ ವೇದಗಳ ಅಸುರ ಬಂಧನವ ಬಿಡಿಸೊ ಮೀನತನುನೀ|
ಸುರರ ಜೋಳಿಗೆಗೆ ಕೊಡಲು ಜೀವಸುಧೆ ಪಡೆದೆ ಕೂರ್ಮಜನುಮಾ|
ಪೊರೆದೆ ಭೂಮಿಯನು ಶರಧಿಯಾಳದಲಿ ಮೆರೆದೆ ಸೂಕರಮುಖಾ|
ಪಡೆದೆ ಸಿಂಹನರ ಜನುಮ ರಕ್ಕಸನ ಉದರ ಸೀಳಿಬಿಡಲೂ|
ನಡೆದೆ ಮೂರಡಿಯ ಬಲಿಯ ಭೂತಳಕೆ ತುಳಿದು ನೂಕಿಬಿಡಲೂ|
ಬಿಡದೆ ಭೂಸುರರ ತರಿದು ಕೊಲ್ಲುತಲಿ ಪರಶು ಬೀಸುತಿರಲೂ|
ನಡೆದೆ ಕಾಡಿನಲಿ ಪಿತನ ಮಾತುಗಳ ಗೌರವ ಕಾಪಿಡುತಲೀ|
ನರರ ಭಾಗ್ಯದಲಿ ಬರೆದೆ ಗೀತೆಯನು ಮೆರೆದೆ ವೇದಗಳನೂ|
ಪರರ ಕಷ್ಟಗಳ ಅಳಿಸಿ ದಮ್ಮವನು ಮೆರೆದೆ ಬದ್ಧತೆಯಲೀ|
ಅರಿವು ಬಿಟ್ಟವರ ತರಿದು ಅಟ್ಟಲಿಕೆ ಯುಗದ ಕಲ್ಕಿಪುರುಷಾ|
ಗುರುವೆ ಉದ್ಧರಿಸು ಕೊಡುತ ಮೋಕ್ಷವನು ಮನುಜ ಜನ್ಮಗಳಿಗೇ|
ಬಾ ಬಾ ಚಿಟ್ಟೆ ಬಣ್ಣದ ಚಿಟ್ಟೆ,
ಚೆಂದವು ನಿನ್ನ ಬಣ್ಣದ ಬಟ್ಟೆ!
ಕೆಂಪು, ಹಳದಿ, ನೀಲಿ, ಹಸಿರು,
ಹೋಳಿ ಹಬ್ಬವು ತುಂಬಾ ಜೋರು!
ಚಿಟ್ಟೆ ಚಿಟ್ಟೆ ಹಾರುವ ಚಿಟ್ಟೆ,
ಹಾರುತ ನೀನು ಎಲ್ಲಿಗೆ ಹೊರಟೆ?
ಮೇಲೆ ಕೆಳಗೆ ಏತಕೆ ಹಾರುವೆ?
ಹೂವಿನ ಮೇಲೆ ಏತಕೆ ಕೂರುವೆ?
ಹೂವಲಿ ಏನನು ಹೀರುವೆ ನೀನು?
ಅದರಲಿ ಇದೆಯೇ ಸಿಹಿ ಸಿಹಿ ಜೇನು?
ಸಿಹಿ ಸಿಹಿ ಸಕ್ಕರೆ ಕೊಡುವೆನು ಬಾ,
ಗಡಿಬಿಡಿ ಮಾಡದೆ ಸುಮ್ಮನೆ ಬಾ!
ಬಂದರೆ ನಿನ್ನ ಜೊತೆಯಲಿ ಆಡುವೆ,
ಹಾರುವ, ಓಡುವ, ಮರಗಳ ನಡುವೆ!
ಆಡಲು ನಿನಗೆ ಗೊಂಬೆಯ ಕೊಡುವೆ,
ಬೇರೆ ಬಣ್ಣದ ಬಟ್ಟೆಯ ತೊಡಿಸುವೆ!
ಬಾ ಬಾ ಚಿಟ್ಟೆ ಬಣ್ಣದ ಚಿಟ್ಟೆ,
ಬಾ ಬಾ ಚಿಟ್ಟೆ ಬಣ್ಣದ ಚಿಟ್ಟೆ!
ಅಮ್ಮಾ ಅಮ್ಮಾ ಬಾರಮ್ಮ,
ಆಗಸದಲ್ಲೇನಿದೆ ನೋಡಮ್ಮ!
ಹೊಳೆಯುವ ಚೆಂಡು,
ಬಿಳಿ ಬೆಳಕಿನ ಗುಂಡು,
ಮೊಲದ ಚಿತ್ರ ಇದೆಯಮ್ಮ,
ಆಡಲು ಬೇಕು ನೀಡಮ್ಮ!
ಅಂಗಳದಲ್ಲೂ ಕಾಣುವುದು,
ಹಿತ್ತಲಲೂ ಜೊತೆ ಓಡುವುದು,
ನಾನೊಬ್ಬನಿದ್ದರೆ ಸಾಕಂತೆ,
ಆಡಲು ಜೊತೆಯು ಬೇಕಂತೆ!
ಅಯ್ಯೋ ಅಮ್ಮಾ ಇಲ್ನೋಡು,
ಬೆಳಕಿನ ಚೆಂಡಿನ ಈ ಪಾಡು!
ಅಯ್ಯೋ ಪಾಪ ನೀರಲಿ ಬಿದ್ದಿದೆ,
ಚಳಿಯಲಿ ನಡಗುತ ನನ್ನನೇ ಕರೆದಿದೆ!
ನೀರಿಂದ ಮೇಲೆ ಎತ್ತೋಣ,
ಬಿಸಿ ಬಿಸಿ ಶಾಖ ನೀಡೋಣ,
ಕುಡಿಯಲು ಹಾಲು ನೀಡೋಣ,
ಜೊತೆಯಲಿ ಆಟ ಆಡೋಣ!
ಗಡಿಗಳು, ಗಡಿಗಳು, ಬೇಡದಾ ಬೇಲಿಗಳು,
ಸಂಘರ್ಷವ ಹುಟ್ಟಿಸುವ ಗಟ್ಟಿ ಬೇರುಗಳು!
ಸಂಕುಚಿತ ಮನಸಿನ ಫಲಗಳೇ ಗಡಿಗಳು,
ಎದ್ದಿವೆ ಎಲ್ಲೆಲ್ಲೂ ಕೃತಕ ಗೋಡೆಗಳು!
ಗಡಿಯಿರುವ ಎಲ್ಲಡೆಯೂ ಸಂಘರ್ಷ ಖಚಿತ,
ಪಾಪದ ಜನರಿಗೆ ಸಂಕಷ್ಟ ಉಚಿತ!
ದೇಶಗಳ ಗಡಿಗಳಲಿ ಯೋಧರದೇ ಬಲಿದಾನ.
ರಾಜ್ಯದ ಗಡಿಗಳಲಿ ಭಾಷೆಯದೇ ಪ್ರಾಧಾನ್ಯ!
ಜಾತಿ, ಧರ್ಮದ ಗಡಿಗಳು ಮನಸುಗಳ ನಡುವೆ!
ಶಾಂತಿ, ಸಹನೆ ಪಾಠಗಳ, ಯಾರಿಗಿದೆ ಗೊಡವೆ?
ಬಾನಿಗೆಲ್ಲಿದೆ ಗಡಿಯು, ಗಾಳಿಗೆಲ್ಲಿದೆ ಗಡಿಯು?
ಹತ್ತಿ ಉರಿಯುವ ಅಗ್ನಿಗೆಲ್ಲಿಹುದು ಗಡಿಯು?
ಪ್ರಳಯದ ಪ್ರವಾಹವ ತಡೆವುದಾವ ಗಡಿಯು?
ಭೂತಾಯ ಪ್ರೀತಿಗೆ ಎಲ್ಲಿಹುದು ಗಡಿಯು?
ದೇವ ದೇವನಿಗಿಲ್ಲ ಯಾವುದೇ ಗಡಿಯು
ಎಲ್ಲರ ದೇಹಗಳೂ ಅವನ ನಿಜ ಗುಡಿಯು
ನನ್ನ ನಿನ್ನ ಅವನ ನಡುವೆ ಬೇಕೆ ಗಡಿಯು?
ವಸುದೈವ ಕುಟುಂಬವು ಅಲ್ಲವೇ ಈ ಜಗವು!
ದೇವ ನೀಡದ ಗಡಿಯ ಗೊಡವೆ ನೀಗೋಣ,
ನಾವೆ ಕಟ್ಟಿದ ಬೇಲಿಗಳ ಕಿತ್ತು ಎಸೆಯೋಣ!
ಒಡೆದು ಹಾಕುವ ಗೋಡೆಗಳ ಗಡಿಯಿಲ್ಲದಂತೆ,
ಸ್ನೇಹದ ಗಾಳಿಯಾಡಲಿ ಎಲ್ಲೆಡೆ ತಡೆಯಿಲ್ಲದಂತೆ!
ಎಳೆನೀರಿನಂತಹ ತಿಳಿನೀರು,
ಬಣ್ಣಗಳು ತಿಳಿನೀಲಿ, ತಿಳಿಹಸಿರು!
ಉಳಿದಿದೆ ನೀಲದ್ವೀಪದ ಹೆಸರು,
ಎದೆಯಲಿಂದು ಅಚ್ಚ ಹಸಿರು!
ತಂದ ಭೂಮ್ಯಾಕಾಶಗಳಿಗೆ ನಂಟ,
ನೀಲಿ ದೇಹದ ಸಾಗರನೆ ಬಂಟ,
ಅಲೆಯಲೆಯಲಿ ಆಗಸನ ಸಿವಿಮಾತ,
ಬುವಿಗೆ ತುಪಿಸುವಾತನೇ ಈತ!
ಮಂದಮಾರುತನ ಹೆಜ್ಜೆಗೆ,
ಅಲೆಗಳು ಕಟ್ಟಿವೆ ಗೆಜ್ಜೆ!
ಇಲ್ಲಿ ಹೆಜ್ಜೆಗೆಜ್ಜೆಗಳ ಮೇಳ
ಮನಕೆ ಮುದದ ಜೋಗುಳ!
ಚಿನ್ನದ ಮರಳ ಮೇಲೆ ಕುಳಿತು,
ಹಾಗೆಯೇ ತಲೆಯೆತ್ತಿದರೆ ಇನಿತು,
ಅಂಬರ ರಾಣಿಯ ಕೆನ್ನೆಯಲಿ,
ಅಂಟಿದೆ ಸಿಗ್ಗಿನ ಕೆನ್ನೀರ ಓಕುಳಿ!
ಬಿಳಿಯ ಕೊಡೆಯ ಮರೆಯಿಂದ,
ಇಣುಕುತಿಹನು ಬೆಳಕಿನೊಡೆಯ.
ರನ್ನದ ಹೊದಿಕೆ ಹೊದ್ದಿಸಿದ,
ಸಾಗರಗೆ ಪ್ರಿಯ ಗೆಳೆಯ!
ಬಂಗಾಳ ಕೊಲ್ಲಿಯಲಿ,
ನೀಲದ್ವೀಪದಂಚಿನಲಿ,
ಮೈಮರೆತ ಚಣಗಳು,
ಸಗ್ಗದಾಚೆಯ ಸುಖಗಳು!
ಮುರಳಿ ಮಾಧವ ಕಮಲ ನಯನನೆ
ಪೊರೆದು ನನ್ನನು ಸಲಹು ತಂದೆಯೆ
ವರವ ನೀಡುತ ಭಕ್ತಿಭಾವವ ಮನದಿ ನೆಲೆಗೊಳಿಸು!
ಕರುಣ ನೇತ್ರನೆ ಶರಣು ಬಂದಿಹೆ
ಪರಮಪಾವನ ಚೆಲುವ ಮೂರ್ತಿಯೆ
ಕರವ ಪಿಡಿಯುತ ಬಾಳ ಬಾಧೆಯ ನೀನೆ ಪರಿಹರಿಸು!
ಚೆಲುವ ಚೆನ್ನಿಗ ಶಾಮಸುಂದರ
ಜಲಜನಾಭನೆ ಮಧುರ ಭಾಷಿಯೆ
ಸಲಹು ಭಕುತರ ಚರಣದಡಿಯಲಿ ನಗುವ ಸೂಸುತಲಿ!
ಗೆಲುವ ತಾರೋ ನನ್ನ ಮನದಲಿ
ಬಲವ ನೀಡೋ ನನ್ನ ತನುವಲಿ
ನಿಲುವೆ ನೋಡೋ ನೀನು ನೀಡುವ ಕಾರ್ಯ ಮುಗಿಸುತಲಿ!
