ಮುಕ್ತಕಗಳು - ೧೨

ಯಂತ್ರಗಳ ಮಿತಿ ಮಾನವನ ಮತಿಗೆ ಸೀಮಿತವು

ತಂತ್ರಗಳು ಎಲ್ಲ ಪ್ರಕೃತಿಗೆ ಸೀಮಿತವು |

ಯಂತ್ರಗಳ ತಂತ್ರಗಳ ಮೀರಿಸಿದೆ ಭಕ್ತಿಯಾ

ಮಂತ್ರ ನಿನ್ನ ಪಡೆಯಲು ಪರಮಾತ್ಮನೆ ||೫೬||

ಹೊಸಯುಗವಿದೆನಲೇಕೆ ಕಲಿಗಾಲ ಕಳೆಯಿತೇ

ದೆಸೆಯು ಬದಲಾಗಿ ಶುಕ್ರದೆಸೆ ಬಂದಿಹುದೆ |

ಹೊಸಬಟ್ಟೆ ತೊಟ್ಟೊಡನೆ ತುಸುಬುದ್ಧಿ ಬಂತೇನು

ಹೊಸಮಾತು ಹೇಳಯ್ಯ ಪರಮಾತ್ಮನೇ ||೫೭||

ಬಾಗಿಲಿಗೆ ತೋರಣವು ಹೋಳಿಗೆಗೆ ಹೂರಣವು

ಭಾಗಿಯಾಗಿವೆ ಜೊತೆಗೆ ಬೇವುಬೆಲ್ಲಗಳು |

ತೂಗಿತೊನೆಯುವ ಮಾವು ಹಾಡಿಕುಣಿಯುವ ನಾವು

ಹೀಗಿದೆಯೊ ಯುಗದಾದಿ ಪರಮಾತ್ಮನೆ ||೫೮||

ವ್ಯಕ್ತಿ ಯಾರಾದರೇನವನರಸನಾಗಿರಲಿ

ಶಕ್ತಿ ತುಂಬಿರಲಿ ಬಾಹುಗಳಲ್ಲಿ ಅಧಿಕ |

ಯುಕ್ತಿಯಲಿ ಅತಿಕುಶಲ ಚತುರಮತಿಯಾದರೂ

ಭಕ್ತಿಗೊಲಿಯುವೆ ಮಾತ್ರ ಪರಮಾತ್ಮನೆ ||೫೯||

ಮರದ ಮೇಲಿನ ಹಕ್ಕಿ ಮರಬೀಳೆ ಹೆದರುವುದೆ

ಶರಧಿಯಲಿರುವ ಮೀನು ಜಲವುಕ್ಕಿಬರಲು |

ನೆರೆಯಲ್ಲ ಜಗದಪ್ರಳಯಕು ಹೆದರೆನು ನಿನ್ನ

ಕರತಲದ ರಕ್ಷೆಯಿರೆ ಪರಮಾತ್ಮನೆ ||೬೦||