ಪುಟ್ಟ ಪುಟ್ಟ ಹೆಜ್ಜೆ ಇಡುತಾ,
ಬಟ್ಟಲ ಕಂಗಳ ಅರಳಿಸಿ ಬರುವೆ,
ನಗುವ ಹೂಗಳ ಪರಿಮಳ ಚೆಲ್ಲುತ,
ಎದೆಯಲಿ ಸಂತಸ ಅರಳಿಸಿ ನಗುವೆ!
ಮಗುವೆ, ಮಗುವೆ, ನೀನೇ ಒಡವೆ,
ಇಲ್ಲ ನಿನಗೆ ಯಾವುದೇ ಗೊಡವೆ,
ಸುಂದರ ಮೊಗವು, ನಿಷ್ಕಲ್ಮಶ ಮನವು,
ಸಂತಸದಲೆಯಲಿ ತೇಲಿದೆ ಗೃಹವು!
ಅಪ್ಪ, ಅಮ್ಮನ, ಮುದ್ದಿನ ಕೂಸೆ,
ಸಂತಸ ಲಹರಿಯ ಚಿನ್ನದ ಮೂಸೆ,
ನಿನ್ನನು ಎತ್ತಿ ಆಡುವ ಆಸೆ,
ಕೊಡುವೆನು ನಿನಗೆ ಒಂದು ಭಾಷೆ!
ಉತ್ತಮ ನೀರು, ಉತ್ತಮ ಗಾಳಿ,
ನಿಮಗೆ ನೀಡುವುದೆಮ್ಮೆಯ ಪಾಳಿ,
ಭಾಷೆಯ ಕೊಡುವೆವು ನಿಮಗಿಂದು,
ಶುದ್ಧ ಪರಿಸರ ರಕ್ಷಣೆ ನಮದೆಂದು!