ಮಾತೆಯೆ ನಿನ್ನಯ ಪ್ರೀತಿಯ ಸುಧೆಯು
ಹರಿಯುವ ಸಿಹಿನೀರ ನದಿಝರಿ ತೊರೆಯು
ಸವಿಯಲು ನೀಡಿದೆ ಮಧುಮಯ ಫಲವ
ತುಂಬಿಸಿ ತಂದಿಹೆ ನಿನ್ನೆದೆ ಒಲವ
ಕಾಲಕೆ ಸುರಿಸುವೆ ಅಮೃತದ ಧಾರೆ
ಕೀಲಕವಾಗಿದೆ ಫಸಲನು ಕೋರೆ
ನೀಡಿದೆ ಹಸುರಿನ ಮೆತ್ತನೆ ತಲ್ಪ
ಸುಮಗಳ ಸುಗಂಧ ಮತ್ತಿಗೆ ಸ್ವಲ್ಪ
ಬೀಸಿದೆ ತಂಗಾಳಿ ನಿನ್ನಯ ಸೆರಗು
ಗಾಳಿಗೆ ಹೋಯಿತು ಕಾಡುವ ಕೊರಗು
ತಿರುಕನೊ ಧನಿಕನೊ ಭೇದವೆ ಇಲ್ಲ
ಸರಿಸರಿ ಹಂಚಿಕೆ ಮಡಿಲಿನ ಬೆಲ್ಲ
ಮನುಜನ ಆಸೆಗೆ ಮಿತಿಯೇ ಇಲ್ಲ
ಬೇಲಿಯ ಹಾಕಿದ ತನಗೇ ಎಲ್ಲ
ಚಿನ್ನದ ಮೊಟ್ಟೆಯ ಇಡುವಾ ಒಡಲು
ಕನ್ನವ ಹಾಕಿದ ಒಮ್ಮೆಲೆ ಪಡೆಯಲು
ರಕುತವ ಕಾರಿದೆ ನಿನ್ನಯ ಒಡಲು
ಕಲುಷಿತಗೊಂಡಿದೆ ಪರಿಸರ ಕಡಲು
ಮಣಿಸುತ ನಮ್ಮಯ ತಪ್ಪನು ನೀಗು
ಕ್ಷಮಿಸುತ ನಮ್ಮನು ಒಯ್ಯುತ ಸಾಗು!
No comments:
Post a Comment