ಮುಕ್ತಕಗಳು - ೧೨

ಯಂತ್ರಗಳ ಮಿತಿ ಮಾನವನ ಮತಿಗೆ ಸೀಮಿತವು

ತಂತ್ರಗಳು ಎಲ್ಲ ಪ್ರಕೃತಿಗೆ ಸೀಮಿತವು |

ಯಂತ್ರಗಳ ತಂತ್ರಗಳ ಮೀರಿಸಿದೆ ಭಕ್ತಿಯಾ

ಮಂತ್ರ ನಿನ್ನ ಪಡೆಯಲು ಪರಮಾತ್ಮನೆ ||೫೬||

ಹೊಸಯುಗವಿದೆನಲೇಕೆ ಕಲಿಗಾಲ ಕಳೆಯಿತೇ

ದೆಸೆಯು ಬದಲಾಗಿ ಶುಕ್ರದೆಸೆ ಬಂದಿಹುದೆ |

ಹೊಸಬಟ್ಟೆ ತೊಟ್ಟೊಡನೆ ತುಸುಬುದ್ಧಿ ಬಂತೇನು

ಹೊಸಮಾತು ಹೇಳಯ್ಯ ಪರಮಾತ್ಮನೇ ||೫೭||

ಬಾಗಿಲಿಗೆ ತೋರಣವು ಹೋಳಿಗೆಗೆ ಹೂರಣವು

ಭಾಗಿಯಾಗಿವೆ ಜೊತೆಗೆ ಬೇವುಬೆಲ್ಲಗಳು |

ತೂಗಿತೊನೆಯುವ ಮಾವು ಹಾಡಿಕುಣಿಯುವ ನಾವು

ಹೀಗಿದೆಯೊ ಯುಗದಾದಿ ಪರಮಾತ್ಮನೆ ||೫೮||

ವ್ಯಕ್ತಿ ಯಾರಾದರೇನವನರಸನಾಗಿರಲಿ

ಶಕ್ತಿ ತುಂಬಿರಲಿ ಬಾಹುಗಳಲ್ಲಿ ಅಧಿಕ |

ಯುಕ್ತಿಯಲಿ ಅತಿಕುಶಲ ಚತುರಮತಿಯಾದರೂ

ಭಕ್ತಿಗೊಲಿಯುವೆ ಮಾತ್ರ ಪರಮಾತ್ಮನೆ ||೫೯||

ಮರದ ಮೇಲಿನ ಹಕ್ಕಿ ಮರಬೀಳೆ ಹೆದರುವುದೆ

ಶರಧಿಯಲಿರುವ ಮೀನು ಜಲವುಕ್ಕಿಬರಲು |

ನೆರೆಯಲ್ಲ ಜಗದಪ್ರಳಯಕು ಹೆದರೆನು ನಿನ್ನ

ಕರತಲದ ರಕ್ಷೆಯಿರೆ ಪರಮಾತ್ಮನೆ ||೬೦||

ಮುಕ್ತಕಗಳು - ೧೧

ಪ್ರಣವವೇ ಪ್ರಥಮ ರವ ಸೃಷ್ಟಿಯಾರಂಭದಲಿ

ಕಣಕಣಕೆ ತಾಯ್ನಾಡಿಯನುಭವವ ನೀಡಿ |

ತಣಿಸಿ ಮನ ತನುವಿಗೀಯ್ವುದು ಮುದದ ಚೈತನ್ಯ

ಮಣಿವೆ ನಾ ಪ್ರಣವಕ್ಕೆ ಪರಮಾತ್ಮನೆ ||೫೧||

ಈಶ್ವರನ ದಯವಿರದೆ ಕಾಗೆ ಕಾಯೆನದು ಜಗ

ದೀಶ್ವರನ ದಯವಿರದೆ ಮೋಕ್ಷವದು ಹೇಗೆ |

ಈಶ್ವರನೆ ಬದುಕಿನಲಿ ಶ್ರೀಚರಣ ಪಿಡಿದಿಹೆನು

ಶಾಶ್ವತದೆಡೆಯ ನೀಡು ಪರಮಾತ್ಮನೆ ||೫೨||

ವೇದಗಳ ಕಾಲದಲಿ ಕಂಡ ನಾರೀಸಮತೆ

ಗಾದೆಗಳ ಕಾಲಕ್ಕೆ ಕಾಣದಾಯ್ತಲ್ಲ |

ಪಾದಗಳ ತೊಳೆದರೂ ನೀಡಿಲ್ಲ ಸಮತೆಯನು

ಭೇದವನಳಿಸಿ ಪೊರೆಯೊ ಪರಮಾತ್ಮನೆ ||೫೩||

ದಾನವರ ಸಂಹರಿಸಲವತಾರಗಳನೆತ್ತಿ

ನೀನವರ ಸಂಹರಿಸಿ ಜಗವನ್ನು ಕಾಯ್ದೆ |

ಮಾನವರೆದೆಯ ದಾನವತೆ ಕಾಣಲಿಲ್ಲವೇ

ನೀನದನು ಮರೆತೆಯಾ ~ ಪರಮಾತ್ಮನೆ ||೫೪||

ಕರ್ಮದಾ ವಿಧಿಯಾಟ ಯಾರಿಗೂ ತಪ್ಪದದು

ಮರ್ಮವನರಿತು ಜರಿಯದಿರು ನೋಯಿಸಿದರೆ |

ಧರ್ಮವನು ಪಾಲಿಸುತ ಕರ್ಮವನು ಸವೆಸುತಿರು

ನಿರ್ಮಲದ ಮನದಿಂದ ~ ಪರಮಾತ್ಮನೆ ||೫೫||

ಮುಕ್ತಕಗಳು - ೧೦

ವಾದಮಾಡಿದರೆ ಫಲವಿಲ್ಲ ಮೂರ್ಖರ ಜೊತೆಗೆ 

ವಾದ ಮಾಡುವುದು ಸಲ್ಲದು ವಿತಂಡಿಯೊಡೆ |

ವಾದ ಮಾಡುವುದು ಗೆಲುವಿಗೆನಲದು ಸರಿಯಲ್ಲ

ವಾದವಿದೆ ಮಂಥನಕೆ ಪರಮಾತ್ಮನೆ ||೪೬||

ಕ್ರೋಧವದು ಮೆರೆವಾಗ ವಾದಕಿಳಿಯುದಿರು ನೀ

ವ್ಯಾಧಿಯನು ಮುಚ್ಚಿಟ್ಟು ರೋಧಿಸಲು ಬೇಡ |

ಸಾಧನೆಗೆ ಗುರಿಯಿಂದ ದೃಷ್ಟಿ ಸರಿಸದೆ ಸದಾ

ಮಾಧವನ ನೆನೆಬೇಕು ಪರಮಾತ್ಮನೆ ||೪೭||

ಕರುಣೆಯಿಲ್ಲದ ಹೃದಯ ಎಣ್ಣೆಯಿಲ್ಲದ ದೀಪ

ಧರಣಿಯಲಿ  ಸಲ್ಲನೀ ದುರುಳದಾ ನವನು |     

ಮರಣದಲಿ ಜೊತೆಯಿಲ್ಲದೊಂಟಿಯಾಗುವನಲ್ಲ

ಕರುಣೆಯಿರೆ ಸಹಬಾಳ್ವೆ ಪರಮಾತ್ಮನೆ ||೪೮||

ಒಳಗಿನಾತ್ಮಕ್ಕಿದೆಯೊ ಕಣ್ಣು ಕಿವಿಯರಿವೆಲ್ಲ

ಬಳಿಯಿದ್ದು ನೋಡುತಿಹ ಸಿಸಿಕ್ಯಾಮೆರವು |

ಒಳಗಿನದು ಮನದ ಹೊರಗಿನದೆಲ್ಲವಚ್ಚಾಗಿ

ತಿಳಿಯುತಿದೆ ನಿನಗೆಲ್ಲ ಪರಮಾತ್ಮನೆ ||೪೯||

ಕಲಿಗಾಲ ಕವಿದಿಹುದು ಸತ್ಯಕ್ಕೆ ಕಾರ್ಮೋಡ

ಲಲನೆಯರಿಗಾಗುತಿದೆ ಶೋಷಣೆಯ ಶಿಕ್ಷೆ |

ಹುಲಿಗಳೇ ತೊಟ್ಟಿಹವು ಗೋಮುಖದ ಮುಖವಾಡ 

ಬಲಿಗಳೇ ಬೇಕೇನು ಪರಮಾತ್ಮನೆ ||೫೦||

ಮುಕ್ತಕಗಳು - ೭

ಉಸಿರು ತುಂಬಿದೆ ವೇಣುವಿಗೆ ನುಡಿಸೆ ಸವಿರಾಗ

ಉಸಿರು ತುಂಬಿದೆಯೆಮಗೆ ನುಡಿಯೆ ಸವಿಮಾತು |

ಉಸಿರು ಉಸಿರಲಿ ನಿನ್ನ ಉಸಿರಿರಲು ಜನರೇಕೆ

ಪಸರಿಸರು ಸವಿನುಡಿಯ ಪರಮಾತ್ಮನೆ ||೩೧||

ನಮಗಿರ್ಪ ಸತಿಸುತರು ಮಾತೆಪಿತರೆಲ್ಲರೂ

ನಮದೇನೆ ಪೂರ್ವಕರ್ಮದ ಫಲಿತವಂತೆ |

ನಮದಾದ ಕರ್ಮಗಳ ತೀರಿಸುವ ಪರಿಕರವು

ನಮಗಿರುವ ನಮ್ಮವರು ಪರಮಾತ್ಮನೆ ||೩೨||

ಯಾರು ಬಂದರು ಜನಿಸಿದಾಗ ಜೊತೆ ಜೊತೆಯಾಗಿ

ಯಾರು ಬರುವರು ಹೋಗುತಿರಲು ಜೊತೆಯಾಗಿ |

ಮೂರು ದಿನಗಳ ಪಯಣದಲಿ ಕಳಚಿದರೆ ಕೊಂಡಿ 

ಕೂರೆ ದುಃಖದಿ ಸರಿಯೆ ಪರಮಾತ್ಮನೆ ||೩೩||

ಒಲವಿರಲಿ ಮಕ್ಕಳಲಿ ನಲ್ಮೆ ಮಾಸದಹಾಗೆ

ಛಲವೇಕೆ ಬಹುಧನದ ಬಳುವಳಿಯ ಕೊಡಲು |

ಬಲಿಯಾಗುವರು ದುಂದು ದುಶ್ಚಟದ ಮೋಹಕ್ಕೆ

ಕಲಿಗಾಲ ತರವಲ್ಲ ಪರಮಾತ್ಮನೆ ||೩೪||

ಮರೆತು ವಾನಪ್ರಸ್ಥವನು ಬದುಕುತಿಹೆವಿಂದು

ಹೊರೆಯಾಗಿ ಜನಮನದ ಸೌಖ್ಯಕ್ಕೆ ಬಂಧು |

ಕರೆಯೆ ವೃದ್ಧಾಶ್ರಮವು ಯಾರು ಕಾರಣ ಪೇಳು

ಜರೆಯದಿರು ಪುತ್ರರನು ಪರಮಾತ್ಮನೆ ||೩೫||

ಕೃಷ್ಣಾ ಮುಕುಂದ

 ಕೃಷ್ಣಾ ಮುಕುಂದ ಹೇ ಪರಮಾತ್ಮ,

ಹೇಗೆ ಕರೆದರೂ ನಿನ್ನ ತೃಪ್ತ ನನ್ನಾತ್ಮ!

ನಾಮಮಾತ್ರದಲ್ಲೇ ಜೇನಿನ ಸ್ವಾದವು,

ದರುಶನದಲ್ಲಿ ಏನುಂಟೋ ಭಾಗ್ಯವು!    

ಈ ಬದುಕಲಿ ನಿನ್ನ ಕಾಣುವ ಬಯಕೆ,

ತೋರೋ ದಾರಿಯ ನಿನ್ನಯ ಗಮ್ಯಕೆ.

ವಿಶ್ವರೋಪ ತೋರಿದೆ ಆ ಪಾರ್ಥನಿಗೆ,

ತೋರೋ ನಿನ್ನ ನಿಜ ರೂಪ ಎನಗೆ!

ಆ ಮುರಳಿಯಲಿ ನಿನ್ನ ಉಸಿರು ಹರಿಸಿ ,

ನುಡಿಸಿದೆ ಎದೆಯಾ ಪ್ರೀತಿಯ ಬೆರೆಸಿ!

ಈ ದೇಹದಲಿ ನಿನ್ನ ಉಸಿರು ಸೇರಿಸಿದೆ,

ತೊಗಲು ಬೊಂಬೆಗೆ ಜೀವವ ತುಂಬಿದೆ!

ಈ ಜೀವ ನಿನ್ನದೇ ನಿನ್ನ ದಾಸ ನಾನು,

ನಿನ್ನಯ ಪಾದದ ಸೇವೆ ಕೊಡುವೆಯೇನು?

ನಿನ್ನ ಪಾದದಾಣೆ ಎಂದೂ ಬಿಡೆ ನಾನು,

ನಾಮವ ರೂಪವ ತುಂಬಿಕೊಂಡಿಹೆನು!

ನಿನ್ನ ಕಂಡ ಕೂಡಲೇ ಸಾಕು ಈ ಜೀವನ,

ನಿನ್ನ ಕಂಡ ರಾಧೆಯಂತೆ ಆಯಿತು ಪಾವನ!

ನೀ ಸಾಲ ಕೊಟ್ಟ ಉಸಿರು ಆ ನಿನ್ನ ಪಾದದಲೇ,

ಅರ್ಪಿಸಿ ಸಮರ್ಪಿಸಿ ಲೀನವಾಗುವೆ ನಿನ್ನಲೇ!

ಮುಕ್ತಕಗಳು - ೩

ಯಶವ ಏನೆಂಬೆ? ಧನ, ವಿದ್ಯೆ, ಸಿರಿಸಂಪತ್ತೆ?

ಪಶು, ಭೂಮಿ, ಅಧಿಕಾರ, ಯೌವ್ವನದ ಬಲವೆ? |

ದಶಕಂಠ ಹೊಂದಿದ್ದೆಲ್ಲವೂ ಗೆಲಿಸಿದವೆ?!

ಯಶವ ಗುಣದಲಿ ನೋಡು ~ ಪರಮಾತ್ಮನೆ  ||೧೧||

ಗುಡಿ ಸುತ್ತಿ ಗುಂಡಾರ ಸುತ್ತಿ ದೇವನೊಲಿಸಲು

ಬಿಡದೆ ತೀರ್ಥಗಳ ಸುತ್ತಿಹೆ ಗಾಣದೆತ್ತೆ! |

ಒಡೆಯನನು ಮರೆತಾಗ ಎದೆಯ ಗೂಡಿನಲಿರುವ

ಕೊಡುವನೇ ಪರಮಪದ ~ ಪರಮಾತ್ಮನೆ ||೧೨||

ನಗೆಯ ಮಲ್ಲಿಗೆಯನರಳಿಸು ಸುಗುಣವಂತನೇ

ಮಗುವಂತೆ ನಕ್ಕುಬಿಡು ನೋವುಗಳ ಮರೆಸೆ |

ಸಿಗುವಂತೆ ಸಿಹಿಬೆಲ್ಲ ಬೇವಿನೆಸಳಿನ ಜೊತೆಗೆ

ಸಿಗಲಿ ಬಾಳಲಿ ಸವಿಯು ಪರಮಾತ್ಮನೆ  ||೧೩||

ಕಾವ್ಯಕನ್ನಿಕೆಯ ರಸಗಂಗೆ ಹರಿದಿದೆ ಸದಾ 

ದಿವ್ಯತೆಯ ಬೆಳಗುತಿಹ ದಿವಿನಾದ ಗೊಂಬೆ |

ನವ್ಯತೆಯ ನಗನತ್ತ ಕಾಲವೇ ಕೊಟ್ಟಿಹುದು

ಭವ್ಯತೆಗೆ ಕುಂದಿಲ್ಲ ಪರಮಾತ್ಮನೆ ||೧೪||

ಎಲ್ಲ ಚಪಲಗಳಲ್ಲಿ ನಾಲಿಗೆಯ ಚಪಲವೇ

ಬಲ್ಲಿದರು ಪೇಳಿಹರು ಬಲು ಜಿಗುಟು ಚಪಲ |

ಗಲ್ಲು ಶಿಕ್ಷೆಗೆ ಹೆದರದಿಹ ದುಷ್ಟ ದುರುಳನೊಲು

ಜೊಲ್ಲು ಸುರಿಸುವ ನಾಲ್ಗೆ ಪರಮಾತ್ಮನೆ ||೧೫||

ಮುಕ್ತಕಗಳು - ೬

ಏಕೆ ರಕ್ಷಿಸಿ ವರಾಹನೆ ಕರಪಿಡಿದೆಯೆನ್ನ  

ಸಾಕಾಯ್ತು ಬವಣೆ ಮನುಜನಿಗೆ ಮನೆಯಾಗಿ |

ಬೇಕು ಬೇಡಗಳು ಬರೆ ಹಾಕುತಿವೆ ದಿನನಿತ್ಯ

ನೂಕಿಬಿಡು ಸಾಗರಕೆ ಪರಮಾತ್ಮನೆ ||೨೬||

ಇಂದು ರಮೆ ಒಲಿದಿರಲು ನಿಶಿತಮತಿಯಾಗಿರಲು

ಹೊಂದುವೆನು ಎಲ್ಲವನು ಎನಬೇಡ  ಬಂಧು |

ಮುಂದೆ ಸುಖ ಪಡೆಯಲಿಕೆ ದಾನವನು ಮಾಡಿದವ

ಮಂದಮತಿ ತಾನಲ್ಲ ಪರಮಾತ್ಮನೆ  ||೨೭||

ಚಿಂತೆಯೇ ಚಿಗುರುವುದು ಬೆಳೆದು ಮರವಾಗುವುದು

ಕುಂತಿರಲು ಸುಮ್ಮನೇ ಸೋಮಾರಿ ಗಂಡು |

ಬಂತು ಮಂಡೆಯಲಿ ಬರೆ ದೆವ್ವಗಳ ಕಾರ್ಖಾನೆ

ಕಂತೆ ಕೆಲಸವ ನೀಡು ಪರಮಾತ್ಮನೆ ||೨೮||

ದೇಹದಣುಗಳ ಹಿಂಪಡೆವೆ ಬದಲಿಸುತ ನಿತ್ಯ 

ಮೋಹಗಳ ಹಿಂಪಡೆದು ಮೋಕ್ಷವನು ನೀಡು |

ದಾಹಗಳ ಹಿಂಪಡೆದು ನಿನ್ನ ದಾಸನ ಮಾಡು

ದೇಹಿ ಎನ್ನುವೆ ತಂದೆ ಪರಮಾತ್ಮನೆ ||೨೯||

ಕೋಪವೇ ಬಂದಿರಲಿ ಮನಸುಗಳು ಬೆಂದಿರಲಿ

ತಾಪದಾ ನುಡಿ ಬೇಡ ಆತುರವು ಬೇಡ

ಜೋಪಡಿಗೆ ಬೆಂಕಿ ಹಚ್ಚುವುದಾವ ಲಾಭಕ್ಕೆ

ಆಪತ್ತು ಬೇಡೆಮಗೆ ಪರಮಾತ್ಮನೆ ||೩೦||