ಪಡುವಣದ ದಿನಮಣಿಗೆ ದಣಿವಾಗಿ ದಾಹವಿರೆ
ಕಡಲಿನಲಿ ತಣಿವರಸಿ ಮುಳುಗುಹಾಕುತ್ತಿಹನು
ಕಡುಕೆಂಪಿನಾ ದೇಹ ಸಾಗರವ ತಾಕಿದೊಡೆ ತಂಪಾಗಿ ನಿದ್ರಿಸಿದನು |
ಅಡಗಿದ್ದ ಚಂದಿರನು ಮದವೇರಿ ಬಂದಿಹನು
ಮಡದಿಯರ ಜೊತೆಗೂಡಿ ರಸಸಂಜೆ ಮೋದದಲಿ
ಹುಡುಕಾಟ ಹುಡುಗಾಟ ಸರಸಸಲ್ಲಾಪಗಳು ರಾತ್ರಿಯಲಿ ಸಾಗುತಿಹವು ||
ಅಂಬರದ ಹೊಸ ಬೆಳಕು ಬುವಿಯಲ್ಲಿ ಚೆಲ್ಲಿರಲು
ತಂಬೆಳಕು ಕರೆಯುತಿದೆ ಸೆಳೆಯುತ ಪ್ರೇಮಿಗಳ
ಸಂಬಾಳಿಸುತ ಮಾರುತನು ತನುವ ಪುಳಕಿಸುತ ನವಲೋಕ ಸೃಷ್ಟಿಸಿಹನು |
ಅಂಬರದ ಸಂಭ್ರಮವು ಬುವಿಯಲ್ಲಿ ಬಿಂಬಿಸಿದೆ
ಹುಂಬ ಚಂದಿರ ತಾರೆಯರೊಲುಮೆ ಹೊಮ್ಮಿಸಿದೆ
ಚುಂಬಕದ ವಾತಾವರಣ ಬೆರೆಸಿ ಮೋಹದಲೆಯ ರಂಗುಗಳಾಟವ ||
ಯಶವನೇನೆಂಬೆ ಧನ ವಿದ್ಯೆ ಸಿರಿ ಸಂಪತ್ತೆ
ಪಶು ಭೂಮಿಯಧಿಕಾರ ಯೌವ್ವನದ ಬಲಗಳೇ
ದಶಕಂಠ ಹೊಂದಿದ್ದವೆಲ್ಲವೂ ಮಣ್ಣಾಗಿ ಪಶುವಂತೆ ಬಲಿಯಾದನು
ಯಶವ ಕ್ಷಣಿಕದ ಮಿಂಚಂತೆ ಕಂಡರೆಷ್ಟೋ
ನಶಿಸದಾ ಯಶವನ್ನು ಪಡೆದವರು ಕೆಲವರೇ
ವಶವಾಯ್ತು ಯಶವು ಗುಣದಲ್ಲಿ ನಿಂತವಗೆ ಹೆಸರಾಗುವನು ಕೊನೆಯವರೆಗೆ
ಕೋಪವೇ ಬಂದಿರಲಿ ಮನಸುಗಳು ಬೆಂದಿರಲಿ
ತಾಪದಾ ನುಡಿ ಬೇಡ ಕಾತುರದ ನಡೆ ಬೇಡ
ಜೋಪಡಿಗೆ ಬೆಂಕಿಯನು ಹಚ್ಚಿಕೊಳ್ಳುವರಾರು ಮೊಗದ ಮೇಗಡೆ ಮಸಿಯನು
ಕೋಪವೇ ಸರ್ವನಾಶದ ಬೀಜ ಬಿತ್ತದಿರಿ ಬುವಿಯಲ್ಲಿ
ತಾಪತ್ರಯಗಳು ಬಾಳಿನಲಿ ಸಾಮಾನ್ಯ ವಿಧಿಯಾಟದಲಿ
ಕೋಪತಾಪಗಳಿಗಿದ್ದರಂಕುಶ ಬಾಳುಹಸನಾಗಿರಲು ಜೀವ ತಂಪು
ಡೊಂಕಿರಬಹುದು ನಾಯಿ ಬಾಲದಲಿ ಬಣ್ಣದಲಿ
ಡೊಂಕೆಲ್ಲಿಹುದು ತೋರಿ ಸ್ವಾಮಿನಿಷ್ಠೆಯಲಿ |
ಡೊಂಕು ಹುಡುಕುವ ಮುನ್ನ ಹುಡುಕೋಣ ಸದ್ಗುಣವ
ಕೊಂಕುಗುಣ ತೊರೆಯೋಣ ಪರಮಾತ್ಮನೆ ||೧೨೧||
ಕಲಿಗಾಲವಿದೆಯೆಂದು ಕೈಚೆಲ್ಲಿ ಕೂರದಿರಿ
ಕಲಿಯ ಮನದಿಂದ ಕಿತ್ತೆಸೆಯೋಣ ಎಲ್ಲ |
ಬಲಿಯಲಿಲ್ಲದೆ ಎಡೆಯು ಕಲಿಕಾಲು ಕೀಳುವನು
ಕಲೆತು ಮಾಡುವ ಬನ್ನಿ ಪರಮಾತ್ಮನೆ ||೧೨೨||
ಚಂಚಲವು ನೀರಿನೊಲು ಆಕಾಶದಗಲವದು
ಮಿಂಚಿಗೂ ವೇಗ ಬೆಂಕಿಯೊಲು ತೀ ಕ್ಷ್ಣವದು |
ಪಂಚಭೂತಗಳ ಗುಣ ಪಂಚೇಂದ್ರಿಯಗಳೊಡೆಯ
ಸಂಚು ಮಾಡುವ ಮನಸು ಪರಮಾತ್ಮನೆ ||೧೨೩||
ಅನುಕಂಪ ಕರುಣೆಗಳು ಅವನಿತ್ತ ಕೊಡುಗೆಗಳು
ಜನಕೆ ಹಂಚುವ ಕೊಂಚಕೊಂಚವಾದರೂ |
ಜನಕನಿತ್ತಾಸ್ತಿಯನು ತನುಜನುಜರಿಗೆನೀಡೆ
ನನಗೇನು ನಷ್ಟವಿದೆ ಪರಮಾತ್ಮನೆ ||೧೨೪||
ಮಲಿನವಾಗುವುದು ಮನ ಪಂಚೇಂದ್ರಿಯಗಳಿಂದ
ಕುಳಿತು ಗ್ರಹಿಸುತಿರಲು ಜಗದ ನಾಟಕವ |
ಕೊಳೆ ತೆಗೆಯಬೇಕು ದಿನದಿನ ಧ್ಯಾನಗಳಿಂದ
ತಿಳಿಯಾಗುವುದು ಮನವು ಪರಮಾತ್ಮನೆ ||೧೨೫||
ಚಿಂತೆಯೊಂದಿರೆ ಮನದಿ ನಿಶ್ಚಿಂತ ಮಾನವನು
ಚಿಂತೆಯಿಲ್ಲದಿರವನು ಜಲತೊರೆದ ಮೀನು |
ಸಂತೆಯಾಗುವುದು ಮನ ಚಿಂತೆಯಿಲ್ಲದರಂತು
ಚಿಂತೆ ಚಿಂತನೆ ತರಲಿ ಪರಮಾತ್ಮನೆ ||೧೧೬||
ಅಮ್ಮನೆನ್ನುವ ನುಡಿಯ ಒಮ್ಮೆ ನುಡಿದರೆಸಾಕು
ಒಮ್ಮೆಲೇ ಮೈಯೆಲ್ಲ ಪುಳಕಿತದ ಭಾವ
ಕಮ್ಮಿಯಾಗದು ಹೆತ್ತೊಡಲ ಮಮತೆ ಮುದ್ದಿಸುವ
ಅಮ್ಮ ನಿನಗಿರುವಳೇ ಪರಮಾತ್ಮನೆ ||೧೧೭||
ನಾವು ಸೂತ್ರದ ಗೊಂಬೆಗಳು ಸಂಶಯವೆ ಇಲ್ಲ
ಜೀವವಿಲ್ಲದ ತೊಗಲು ಗೊಂಬೆಗಳು ಅಲ್ಲ |
ದೇವನರುಹಿಹ ವಿಧಿಯ ಸೂತ್ರ ಹರಿಯುವ ವಿದ್ಯೆ
ಜೀವನಕೆ ಸೂತ್ರವಿದು ಪರಮಾತ್ಮನೆ ||೧೧೮||
ನಮ್ಮ ತಪ್ಪೆಲ್ಲವಕೆ ಬೆನ್ನೊಡ್ಡಿ ಕುಳಿತಾಗ
ಸುಮ್ಮನವು ಜಗದಿಂದ ಮರೆಯಾಗುವವೇ |
ನಮ್ಮ ಜಗ ಕುರುಡಲ್ಲ ಎಣಿಸುವುದು ತಪ್ಪುಗಳ
ಸುಮ್ಮನೇಕೀ ನಟನೆ ಪರಮಾತ್ಮನೆ ||೧೧೯||
ಇರುಳು ಕಳೆದಾ ಮೇಲೆ ಹಗಲು ಬರಲೇಬೇಕು
ಸುರಿಯುತಿಹ ಮಳೆಯೊಮ್ಮೆ ನಿಲ್ಲಲೇ ಬೇಕು |
ಧರಣಿಯೊಳು ಇದು ಸತ್ಯ ಕಾಲಮಹಿಮೆಯ ಸೂತ್ರ
ಕೊರಗದೆಲೆ ಕಾಯುವೆನು ಪರಮಾತ್ಮನೆ ||೧೨೦||
ಮನಕೆ ನೆಮ್ಮದಿಯಿಲ್ಲ ಸುಖವನ್ನು ಮರೆತಾಯ್ತು
ಧನಕನಕಗಳ ಕೂಡಿಡುವ ಲೋಭ ಮುಸುಕಿ |
ಹಣವಧಿಕವಿರೆ ಹಂಚಿಕೊಳ್ಳದಿರೆ ದೀನರಲಿ
ಧನವಾಗ್ವುದರ್ಬುದವು ಪರಮಾತ್ಮನೆ ||೧೧೧||
ಕಲಿಯುವರೆ ಬಾಲಕರು ನಾವು ಹೇಳಿದ ಕೇಳಿ
ಬಲುಬೇಗ ಕಲಿಯುವರು ನಮ್ಮ ನಡೆ ನೋಡಿ |
ಕಲಿಯಲೇಬೇಕಿಹುದು ಕಲಿಸುವಾ ಮುನ್ನವೇ
ಕಲಿಯಬೇಕಿದೆ ಬೇಗ ಪರಮಾತ್ಮನೆ ||೧೧೨||
ಕಾವನಿಗೆ ಬೇಕೇಕೆ ಕಾವಲಿನ ಕೋಟೆಗಳು
ದೇವನಿಗೆ ಬೇಕಿಲ್ಲ ರಜತಕನಕಗಳು |
ಹೂವುಹಣ್ಣುಗಳನರ್ಪಿಸೆ ಸಾಕು ಬಕುತಿಯಲಿ
ಗೋವಿಂದನನೊಲಿಸಲು ಪರಮಾತ್ಮನೆ ||೧೧೩||
ಬೆದರಿಹರು ಪಿಳ್ಳೆಗಳು ಕೋರೋನ ಗುಮ್ಮಕ್ಕೆ
ಕದದಾಚೆ ಕಾಲಿಡರು ಕಾಡುತಿದೆ ಭೀತಿ |
ಚದುರಿ ಹೋಗುತಿದೆ ಆತ್ಮಸ್ಥೈರ್ಯ ಚಿಣ್ಣರದು
ಬದುವ ಕಳೆ ಹೆಚ್ಚುತಿದೆ ಪರಮಾತ್ಮನೆ ||೧೧೪||
ಮಮತೆಯಾ ಹಿತವಿರಲಿ ಗೆಳೆತನದ ಸವಿಯಿರಲಿ
ಸುಮದ ಸೊಬಗಿರಲಿ ಚಂದನದ ಘಮವಿರಲಿ |
ಸಮತೆಯ ಸ್ವಾದ ನಿಸ್ವಾರ್ಥ ತಳಹದಿಯಿರಲಿ
ನಮದೆನುವ ನಡತೆಯಲಿ ಪರಮಾತ್ಮನೆ ||೧೧೫||
ಪಿಡುಗು ಕಾಡಿದೆ ವಿಶ್ವದಾದ್ಯಂತ ಎಲ್ಲರನು
ಕುಡಿಕೆ ಹೊನ್ನು ಗಳಿಸುವ ಪಿಡುಗು ಕೆಲವರನು |
ಎಡೆಬಿಡದೆ ಬದುಕುಗಳ ಹೆಣಮಾಡಿ ಧನಗಳಿಸೆ
ತಡೆಯುವಾ ಗಂಡೆಲ್ಲಿ ಪರಮಾತ್ಮನೆ ||೧೦೬||
ಮೆರವಣಿಗೆ ಸಾಗುತಿದೆ ರಸ್ತೆಯಲಿ ಗಾಡಿಗಳ
ಪರಿವೆಯಿಲ್ಲದೆ ವಿಷಾನಿಲವ ಚೆಲ್ಲುತಲಿ
ಹೊರಟಿರುವುದೆಲ್ಲಿಗೆನೆ ಮರಳಿಬಾರದಕಡೆಗೆ
ನೆರೆಯಲ್ಲೆ ಸುಡುಗಾಡು ಪರಮಾತ್ಮನೆ ||೧೦೭||
ಪ್ರಾರ್ಥನೆಗೆ ಮೀರಿರುವುದೇನಾದರುಂಟೇನು
ಆರ್ತನಾ ಬೇಡಿಕೆಯಲಿದೆ ಪೂರ್ಣಶಕ್ತಿ |
ಧೂರ್ತರಿಗೆ ನಿಲುಕದದು ಮನದೆ ಕಲ್ಮಶವಿರೆ
ಪ್ರಾರ್ಥನೆಗೊಲಿಯುವೆ ನೀ ಪರಮಾತ್ಮನೆ ||೧೦೮||
ಹೊರಲು ಹೆಗಲುಗಳಿಲ್ಲ ಸುಡಲು ಕಟ್ಟಿಗೆಯಿಲ್ಲ
ಉರುಳುತಿಹ ದೇಹಗಳ ಹೂಳಲೆಡೆಯಿಲ್ಲ |
ಕಿರುಬಗಳು ಕದಿಯುತಿವೆ ದೇಹದಂಗಾಂಗಗಳ
ಸರಿದಾರಿ ತಪ್ಪಿಹೆವು ಪರಮಾತ್ಮನೆ ||೧೦೯||
ವೈರಾಣುವಾಗಿಹನು ಮನುಜನೇ ಭೂರಮೆಗೆ
ತೀರದಾಸೆಗಳಿಂದ ಘಾಸಿಗೊಳಿಸಿಹನು |
ವೈರಾಣು ಕಳಿಸಿಹಳು ದೋಷಿಗಳ ನಾಶಕ್ಕೆ
ಮಾರಕಾಸ್ತ್ರದ ಧಾಳಿ ಪರಮಾತ್ಮನೆ ||೧೧೦||
ಮಾರಾಟವಾಗುತಿವೆ ಶಾಲುಪೇಟಗಳಿಂದು
ಕೋರಿದವರಿಗೆ ಮಕುಟವಾಗುತಿದೆ ಪೇಟ
ಮಾರಾಟವಾಗುತಿವೆ ವೇದಿಕೆಯ ಮಧ್ಯದಲಿ
ಜೋರಿನಾ ವ್ಯಾಪಾರ ಪರಮಾತ್ಮನೆ ||೧೦೧||
ನಗುನಗುತಲಿರಬೇಕು ನವಸುಮವು ಅರಳುವೊಲು
ಮಗುವಿನಾ ನಗುವಂತೆ ಪರಿಶುದ್ಧವಾಗಿ |
ಬಿಗಿದ ಮೊಗಗಳ ಸಡಿಲಗೊಳಿಸಿ ನೋವ ಮರೆಸಲು
ನಗುವೆ ನೋವಿಗೆ ಮದ್ದು ಪರಮಾತ್ಮನೆ ||೧೦೨||
ತಪ್ಪು ಮಾಡದವರಾರುಂಟು ಜಗದಲಿ ತಮ್ಮ
ತಪ್ಪನೊಪ್ಪಿಕೊಳುವವರತಿವಿರಳವಿಹರು |
ತಪ್ಪನಿತರರ ಮುಡಿಗೆ ಮುಡಿಸುವರು ಬಲುಬೇಗ
ತಪ್ಪ ನುಡಿದಿರೆ ತಾಳು ಪರಮಾತ್ಮನೆ ||೧೦೩||
ತಾಳು = ಸಹಿಸಿಕೋ
ರೋಗಿಗಳ ನೋವಿನಲಿ ನೋಟು ಕಂಡರು ಕಂತೆ
ಯೋಗವೋ ಅತಿಧನದ ಮೋಹವೋ ಕಾಣೆ |
ಜೋಗುಳವ ಹಾಡುವರೆ ಚಾಟಿ ಹಿಡಿದಂತಾಯ್ತು
ಹೋಗುತಿವೆ ಜೀವಗಳು ಪರಮಾತ್ಮನೆ ||೧೦೪||
ಹಿಂದಿನದ ನೆನೆಯುತಿರೆ ನೋವು ಮರುಕಳಿಸುವುದು
ಮುಂದಿನದ ಯೋಚಿಸಲು ಮೂಡುವುದು ಭಯವು |
ಇಂದು ನಮ್ಮೊಂದಿಗಿರೆ ತಪ್ಪು ಮಾಡದಿರೋಣ
ಎಂದಿಗೂ ಸರಿದಾರಿ ಪರಮಾತ್ಮನೆ ||೧೦೫||
